KAMATI YA SIASA YA CCM, WILAYA YA MAKETE, YAMPONGEZA DED MAKUFWE KWA USIMAMIZI MZURI WA MIRADI

Tarehe Iliyowekwa: December 19th, 2023

Kamati ya Siasa ya Chama Cha Mapinduzi, CCM, Wilaya ya Makete, leo Desemba 19, 2023, imeendelea na Ukaguzi wa utekelezaji wa Ilani ya Chama hicho, katika Halmashauri ya Wilaya ya Makete, ambapo wamepongeza juhudi za Mkurugenzi Mtendaji wa Halmashauri hiyo, Ndg. William M. Makufwe kwa usimamizi mzuri wa miradi ya maendeleo.

Hayo yamesemwa leo na Mwenyekiti wa Kamati ya Siasa (CCM) Wilaya ya Makete, ambaye pia ndiye Mwenyekiti wa Wilaya wa Chama hicho, Ndg. Clemence Mwamwite Ngajilo, mara baada kukamilisha ukaguzi wa Utekelezaji wa Ilani katika Shule ya Sekondari ya Wavulana ya Makete, iliyopo katika kijiji Cha Mbela, Kata Mlondwe, wilayani Makete, Shule ya Sekondari Matamba iliyopo Kata ya Matamba, Shule ya Sekondari Kinyika, pamoja na Shule ya Msingi Iwale, iyopo katika Kijiji Cha Ndapo, zote zikiwepo katika Kata ya Kinyika.

"nikupongeze Mkurugenzi Mtendaji kwa kazi kubwa ya Usimamizi wa miradi ya maendeleo, inayofanyika katika Halmashauri yako, kwakweli mnafanya kazi kubwa sana ya kukisemea Chama kupitia miradi hii, kwakuwa wananchi wataka Maendeleo na vinginevyo" Alisema Ndg. Ngajilo.

Aidha, Ndg. Ngajilo amewataka walimu pamoja na wananchi kwa pamoja kuilinda na kuitunza miundombinu hiyo, kwakuwa imetumia Fedha nyingi sana hadi kukamilika kwake, baada ya kugundua kuwepo Kwa uharibifu katika baadhi ya majengo kwenye Shule ambazo kamati hiyo imetembelea hii leo. 

Naye , Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amesema kuwa, iliwabidi kuongeza Fedha kwenye baadhi ya miradi Ili iweze kukamilika kwa wakati.

"hapa Mlondwe, ilibidi tuongeze Fedha kiasi cha Shilingi milioni 200 za kitanzania, ili Shule hii iweze kukamilika, hata hivyo wenzetu wa TASAF watatujengea Bweni pamoja na Nyumba ya walimu 2 Kwa 1" Alisema Ndg. Makufwe.

 Hata hivyo, Kamati hiyo ya Siasa ya Chama cha Mapinduzi (CCM), wilayani Makete, ikiwa katika ziara hiyo imefanya mkutano wa hadhara katika kata ya Kinyika, Ili kusikiliza na kutatua kero za wananchi ambazo wamekuwa wakikutana na nazo katika utekelezaji wa majukumu yao ya kila siku hususani kwenye shughuli za kiuchumi, kama vile Changamoto ya Umeme, barabara pamoja na kukosekana kwa soko la mazao ya nafaka.

Imeandaliwa na:

Kitengo cha Mawasiliano Serikalini,

Halmashauri ya Wilaya ya Makete.