KATA 11 WILAYANI MAKETE ZANUIA KUANZISHA HALMASHAURI YA WILAYA YA KITULO

Tarehe Iliyowekwa: December 8th, 2023

Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amepongeza uwepo wa wazo la kuanzishwa kwa Halmashauri ya Wilaya ya Kitulo, ikiwa ni njia mojawapo ya kuchochea maendeleo kwa wananchi wa ukanda huo

Ndg. Makufwe, amesema hayo leo, Desemba 8,2023, kwenye kikao kilichoitishwa na wadau wa mchakato huo, ambacho kimefanyika katika kata ya Matamba, ambapo amewashauri kufuata sheria na taratibu zilizowekwa na serikali katika mchakato wa kuanzishwa kwa Halmashauri, hivyo ili waweze kukamilisha kwa azma hiyo ya wananchi wa kusini mwa Wilaya ya Makete.

“kuna vigezo ambavyo vimewekwa na serikali, kama vile Idadi ya watu, Uwezo wa kujitegemea kibajeti, na Eneo la kijiografia, na kwamba kamati za kata zinatakiwa kuwasilisha maoni yake na kujadiliwa na CMT, ikiwa ni pamoja na ushirikishwaji wa wananchi wa maeneo husika” Alisema Makufwe.

Aidha, Ndg. William M. Makufwe, amesema kuwa hatakuwa kikwazo katika kufanikisha jambo hilo, ambalo endapo litafanikiwa kata za Matamba, Kitulo, Kinyika, Mlondwe, Ipelele, Iniho, Ikuwo, Mfumbi, Kigala, Itundu, na Kigulu zitaenda kuunda halmashauri ya mpya ya Wilaya ya Kituto.

Sambamba na hayo, Ndg. Makufwe, amewataka wanamakete na watanzania wote kwa ujumla, kuchangamkia fursa ya Kilimo cha Ngano, kwakuwa mbegu za zao hilo zimeshatolewa bure na serikali, na kwamba Halmashauri imeanza mchakato wa kutafuta uwekezaji wa kiwanda cha kusindikiza zao hilo.

Hata hivyo, Ndg. William M. Makufwe, baada ya kikao hicho, amekagua ujenzi wa madarasa mawili na ofisi, katika shule ya msingi Iwale, iliyopo kata ya Kinyika, Wilayani Makete, ambapo amewataka mafundi kukamilisha ujenzi huo mapema, ili madarasa hayo yaanze kutumika Januari 8, 2024.

Ikumbukwe kuwa, madarasa hayo yanajengwa kupitia fedha za mapato ya ndani, ambapo kiasi cha shilingi milioni 150, zimetolewa na Halmashauri ya Wilaya ya Makete, ili kuhakikisha watoto wa kijiji cha Iwale wanasoma katika mazingira bora.

Imeandaliwa na: 

Kitengo cha Mawasilino serikalini,

Halmashauri ya Wilaya ya Makete.