KATA YA LUWUMBU

Tarehe Iliyowekwa: May 26th, 2022

Mkuu wa Wilaya ya Makete Mh. Juma Sweda amemuagiza Mkandarasi anayejenga mradi wa maji Kijiji cha Uganga Kata ya Luwumbu kuhakikisha mradi huo unakamilika kwa wakati ili kupunguza adha ya maji kwa wananchi wa kijiji hicho.

Mradi huo unaojengwa na Mkandarasi mzawa Ladislaus Kyando unatarajiwa kukamilika mwishoni mwa mwezi Juni,2022 na zoezi linaloendelea sasa ni ukamalishaji wa vituo vya maji.

Agizo hilo ametoa mara baada ya kufika kijijini hapo kusikiliza kero za wananchi ambapo wananchi hao walimweleza changamoto kubwa ya kukosekana kwa maji safi na salama kijijini hapo.

Wananchi wa Uganga wamesema, ni zaidi ya miezi 6 imepita mkandarasi tangu aanze ujenzi wa Mradi huo lakini mpaka sasa changamoto hiyo haijatatuliwa.

Afisa maendeleo ya Jamii kutoka RUWASA Bi. Beaty Sileke amesema mradi huo mpaka kukamilika kwake unatarajiwa kutumia kiasi cha shilingi Milioni 200 katika kukabiliana na changamoto ya maji Uganga.

Pia amemuahidi Mkuu wa Wilaya kuwa ofisi ya RUWASA Makete inamsimamia kwa karibu mkandarasi huyo na kwamba mradi utakamilika kama walivyokubaliana kwa mujibu wa mkataba.

Mradi huo ulianza kujengwa mwishoni mwa mwaka 2021 na unatarajiwa kutoa huduma kwa wananchi wasiopungua 350 kijijini hapo.