KATIBU TAWALA MKOA WA NJOMBE AAGIZA KUPELEKWA FEDHA ZA MAPATO HALISI YA NDANI KWENYE MIRADI YA MAENDELEO

Tarehe Iliyowekwa: May 24th, 2024

Katibu Tawala wa mkoa wa Njombe, Bi. Judica Omari, ameziagiza Halmashauri zote mkoani humo, kuhakikisha kuwa, zinapeleka fedha za mapato halisi ya ndani kwenye miradi ya maendeleo, kabla ya mwaka wa fedha wa 2023/2024 kukamilika.

Bi. Judica Omari, amesema hayo leo Mei 24, 2024 kwenye kikao cha Tathmini ya Ukusanyaji wa Mapato Kimkoa, ambacho kimefanyika katika ukumbi wa Bomani uliopo katika makao makuu ya Halmashauri ya Wilaya ya Makete.

“Nimeridhishwa na ukusanyaji wa mapato Halisi na Lindwa kwa kila Halmashauri, sambamba na mwenendo wa ukusanyaji wa mapato, lakini hakikisheni Mapato halisi ya ndani ambayo ni asilimia 20/40/60 yanapelekwa kwenye miradi ya Maendeleo” alisema Bi. Judica.

Aidha, Bi. Judica Omari, amesema kuwa, mapato lindwa ambayo yanakusanywa na vituo vya Afya, Zahanati na Hospitali za Wilaya, yatumike  vizuri ikiwa ni pamoja na kupelekwa kwenye maeneo yaliyokusudiwa kama vile kununua Dawa, Vifaa tiba pamoja na Stahiki za watumishi.

Sambaba na hayo, Katibu tawala huyo wa mkoa wa Njombe, amewataka Wakuu wa Idara ya Maendeleo ya Jamii, kujiandaa kuanza kutoa mikopo ya asilimia 10 kwa makundi maalumu ya Wanawake, Vijana na Walemavu, kwakuwa walikuwa na muda mrefu wa kukusanya madeni pamoja na kuweka mpango kazi wa utekelezaji wake.

Hata hivyo, Bi. Judica Omari, ameziagiza Halmashauri hizo za mkoa wa Njombe, kuhakikisha kuwa miradi vipolo iliyoanzishwa na wananchi, Serikali Kuu na Wadau wa Maendeleo  inakamilika haraka iwezekavyo ili iweze kutoa huduma kwa jamii husika.

Ikumbukwe kuwa, kikao hicho cha Tathmini kililenga; kupokea taarifa ya Mapato hadi kufikia Aprili 30,2024, kubainisha vyanzo vinavyofanya vizuri na vibaya katika ukusanyaji wa mapato kuishia Aprili 30,2024, Kupokea taarifa za miradi ya maendeleo kuishia Aprili 30,2024, Hali ya Makusanyo kupitia mfumo wa TAUSI pamoja na Mikopo ya vikundi iliyokopeshwa kabla ya tamko la kusitishwa utoaji wa mikopo iliyotolewa Aprili 2023, marejesho yaliyofanyika na kiasi cha mikopo ambayo haijarejeshwa.

Imeandaliwa na:

Kitengo cha Mawasilino ya Serikali,

Halmashauri ya Wilaya ya Makete.