KIKAO CHA KAMATI YA SENSA

Tarehe Iliyowekwa: May 24th, 2022

Kamati ya Sensa ngazi ya Wilaya ya Makete imefanya kikao leo tarehe 24 Mei, 2022 ikiongozwa na Mkuu wa Wilaya ya Makete Mh. Juma Sweda kwa lengo la kujadili taarifa mbalimbali za maandalizi ya Sensa itakayofanyika tarehe 23 Agosti 2022.

Katika kikao hicho Mratibu wa Sensa Wilaya ya Makete Ndg. Aloyce Mwalukisa amewasilisha taarifa inayoonesha namna zoezi hilo litakavyofanyika, ambapo jumla ya maeneo 442 yametengwa kutoka kata 23 zilizopo Wilaya ya Makete katika muundo wa vitongoji kwa ajili ya kuhesabia watu wakati wa zoezi hilo.

Ameongeza kuwa zoezi la Sensa litahusisha uhesabuji wa watu wote watakaokuwa wamelala mahali husika kuamkia siku ya tarehe 23 Agosti 2022 ambapo taarifa zao muhimu zitakusanywa.

Katibu wa Sensa amesema “zoezi la Sensa kwa mwaka 2022 ni tofauti na Sensa iliyofanyika miaka ya nyuma kwa kuwa mwaka huu zoezi hili litajumuisha uhesabuji wa watu na makazi”.

Mkuu wa Wilaya ya Makete Mh. Juma Sweda ameipongeza Kamati ya Sensa Wilaya kwa maandalizi na kuongeza kuwa Serikali ya awamu ya sita imedhamiria kuboresha miundombinu ya Afya, Elimu, Barabara na Maji.

“Kila baada ya miaka 10 zoezi hili hufanyika na mwaka huu Serikali imeongeza jambo la msingi zaidi kwa kuhesabu watu na makazi tofauti na Sensa zilizopita, hivyo Kamati hii itahakikisha usimamizi wa zoezi hili unafanyika kwa umakini kama ambavyo Serikali inatarajia zoezi hili lifanyike katika upatikanaji wa taarifa muhimu ili kufanya maamuzi katika sekta mbalimbali”.

Kikao hicho pia kimehudhuriwa na Mwenyekiti wa Halmashauri ya Wilaya ya Makete Mh. Francis Chaula, Mkurugenzi Mtendaji Halmashauri ya Wilaya ya Makete Ndg. William Makufwe, Katibu Tawala Wilaya ya Makete Bi. Grace Mgeni, Kamati ya Ulinzi na usalama ya Wilaya, wajumbe na wadau mbalimbali watakaoshiriki katika zoezi la Sensa.