KIKAO KAZI CHA RUWASA

Tarehe Iliyowekwa: May 28th, 2022

Mkuu wa Wilaya ya Makete Mh. Juma Sweda amezitaka Jumuiya za Wakala wa Maji na usafi wa mazingira Vijijini (RUWASA) kuhakikisha wananchi wanapata maji kwa uhakika.

Ameyasema hayo Mei 27, 2022 wakati wa ufunguzi wa kikao kazi cha mafunzo ya Kamati tendaji za vyombo vya watoa huduma ya Maji ngazi ya jamii kwenye ukumbi wa Mamlaka ya mji mdogo Iwawa Makete Mjini.

“kumekuwa na changamoto ya maji ya uhakika kwa wananchi wa Makete, pamoja na kwamba tuna vyanzo vingi vya maji kwenye Wilaya yetu…hakikisheni tunatekeleza adhma ya Serikali ya awamu ya sita (6) kumtua mama ndoo kichwani”.

“Kikao kazi hiki kiwasaidie ninyi kusogeza huduma kwa wananchi na ikiwezekana fikisheni maji nyumbani kwa mteja, Serikali inatoa fedha nyingi za miradi ya maji Wilayani hap ana msimamie maji yasipotee hovyo”. Aliongeza Mh. Sweda

Mkurugenzi Mtendaji Wilaya ya Makete Ndg. William Makufwe amesema jumuiya hizo zinapaswa kufungua akaunti za benki mapema ili kuwa na kumbukumbu sahihi za mapato na matumizi ya fedha za Jumuiya na mazingira rafiki ya uhifadhi wa mapato.

Pia mkurugenzi huyo amesema RUWASA ianze utaratibu wa kuweka Luku za maji za kulipa kabla ya matumizi na kuwazoesha wateja ili kulinda raslimali ya maji ambayo imekuwa ikipotea bila kujua.

“Angalieni njia rahisi ya kuwazoesha wateja wetu waanze kununua maji kabla ya matumizi kama ambavyo Tanesco wanafanya, hii itasaidia kuzuia upotevu wa maji na wateja wetu waanze kuzoea mabadiliko hayo”.

Meneja wa RUWASA Wilaya ya Makete mhandisi Innocent Lyamuya amesema lengo la kikao kazi hicho kwa viongozi wa Jumuiya za watumia maji ni kuwajengea uwezo wa kuhakikisha huduma zinapatikana kwa haraka kwa mwananchi na kudhibiti upotevu wa mapato ya Jumuiya

Kikao kazi hicho cha mafunzo ya kamati tendaji za vyombo vya watoa huduma ya Maji ngazi ya jamii kimefanyika kwa siku mbili kuanzia tarehe 27-28, Mei 2022.