Kitimoto yaruhusiwa Tandala-Makete

Tarehe Iliyowekwa: September 7th, 2022

Wauzaji wa nyama ya nguruwe Kata ya Tandala Wilayani Makete wameruhusiwa kuuza nyama hiyo baada ya kuzuiwa kwa zaidi ya mwezi mmoja uliopita

Afisa Mifugo na Uvuvi Wilaya ya Makete Bwana Aldo Mwapinga amesema sasa wauzaji wa nyama ya nguruwe na walaji wanaruhusiwa kuuza na kununua baada ya kutoripotiwa kifo chochote cha nguruwe kwa muda mwezi mmoja.

Mwapinga amesema ruhusa hiyo itaanza leo 07 Septemba 2022 baada ya kujiridhisha kuwa homa ya nguruwe iliyokuwepo katika eneo hilo na kupelekea katazo kuwekwa sasa hali ni shwari.

“Tumewaita wachinjaji wote wa nguruwe na kukaa nao Pamoja na wataalamu wetu wa Kata ili kupeana utaratibu wa namna bora ya kuchinja na tumewaelewesha vizuri, kwa hiyo taarifa zimesambaa kote na leo uchinjaji unaanza” Mwapinga

Pia wachinjaji wa nguruwe wametakiwa kufuata taratibu zote za uchinjaji kwa kuhakikisha wanauza nyama iliyopimwa huku wakiwekewa zuio la kutochinja nguruwe atakayetoka nje ya Kata hiyo.

Afisa Mifugo kata ya Tandala Bw.Ushindi Chongolo amesema kwa sasa ni ruksa kuchinja lakini kwa kuanza wanaruhusu kuchinjwa nguruwe waliopo ndani ya kata hiyo kwanza na si wa kutoka maeneo ya nje ya Kata husika.