LIMENI BUSTANI ZA MBOGAMBOGA , KUPAMBANA NA UDUMAVU- BI. JACKLINE NANNAUKA

Tarehe Iliyowekwa: November 24th, 2023

Kampeni ya Utolewaji wa Elimu ya Umuhimu wa Lishe Bora, kwa watoto wadogo imeendelea leo Novemba 24, 2023, katika kijiji cha Ihela, kilichopo kata ya Tandala, na kijiji cha Maleutsi, kilichopo kata ya Iwawa, ambapo wazazi na walezi wametakiwa kuhakikisha kuwa milo mitatu yenye mchanganyiko wa vyakula tofauti inapatikana majumbani mwao.

Akizungumza katika Kampeni ya kutokomeza Udumavu, Afisa Lishe wa Halmashauri ya Wilaya ya Makete, Bi. Jackline Nannauka, amewataka wakazi wa vijiji hivyo, kuhakikisha kuwa wanawapa watoto wao, vyakula vyenye Protini kwa wingi kama vile Mayai, Nyama na mbogamboga ili waweze kuwa na Afya bora makuzi yao ya kila siku.

Aidha, Bi. Jackline Nannauka, ameongeza kwa kuwataka wananchi hao, kuhakikisha kuwa wanalima bustani za mboga mboga majumbani pamoja na maeneo ya shule kwa kuzingatia wingi wa wanafunzi, ili kila mtoto aweze kupata chakula bora ambacho kitamjenga kiakili.

Kwa Upande wake, Kaimu Afisa Maendeleo ya Jamii, Halmashauri ya Wilaya ya Makete, Bi. Esther Lamosai, amewataka wakazi wa vijiji vya Ihela na Maleutsi, kuhakikisha kuwa wanapambana na ukatili wa kijinsia, kwa kutenga muda wa kuongea na watoto wao ili waweze kujua mienendo ya kitabia.

“Acheni kuwaozesha watoto wadogo, ni kosa kisheria, waacheni watimize ndoto zao, kila mzazi au mlezi atawajibika kwa kumkosesha Elimu mtoto wa kike“Alisema Bi. Esther Lamosai.

Hata hivyo, baadhi ya wakazi wa Kijiji cha Ihela kilichopo kata ya Tandala, wilayani Makete, wakizungumza kwa nyakati tofauti kwenye Kampeni hiyo, wamekiri kuwepo kwa vyakula bora katika maeneo yao licha kuonekana kushamiri kwa utapiamlo, ambapo wamebainisha kuwa changamoto iliyopo ni namna bora ya matumizi ya vyakula hivyo.

Sambamba na hayo, Mchg, Festo Anderson Mbilinyi, wa KKKT, Usharika wa Ihela, cameshukuru kutolewa kwa Elimu hiyo muhimu ya  makuzi ya mtoto, kutokana na kuwepo kwa ongezeko la Utapiamlo, na kwamba kampeni hiyo itakuwa chachu kwa wakazi wa kijij hicho katika kupambana na Udumavu.

Imeatolewa na:

Kitengo cha Mawasiliano Serikalini. 

Halmashauri ya Wilaya ya Makete.