MAADHIMISHO YA MUUNGANO

Tarehe Iliyowekwa: April 26th, 2022

 Tarehe 26 Aprili 2022 Wilaya ya Makete imefanya maadhimisho ya siku ya Muungano wa Tanganyika na Zanzibar kwa kufanya usafi katika Hospitali ya Wilaya ya Makete Pamoja na  kuwaona wagonjwa waliolazwa ili kuwapa zawadi mbalimbali kama sehemu ya kuwafariji wagonjwa hao.

Maadhimisho hayo yalianza na maandamano kutoka Ofisi ya Mkuu wa Wilaya ya Makete kuelekea Hospitali ya Wilaya yakihusisha watumishi wa Serikali,wananchi na wanafunzi wa shule za Msingi na Sekondari zilizopo Kata ya Iwawa pamoja chuo cha Ufundi stadi VETA Makete.

Mgeni rasmi kwenye maadhimisho hayo ndg. William Makufwe ambaye ni  Mkurugenzi Mtendaji wa Halmashauri ya Wilaya kwa niaba Mkuu wa Wilaya Mh. Juma Sweda akizungumza kwenye maadhimisho hayo amesema, wanaMakete na Watanzania wanapaswa kuenzi Muungano huku akiwasihi kuendelea kufanya kazi kwa bidii.

“Katika maadhimisho haya tumetoa zawadi kwa wagonjwa waliolazwa kama sehemu ndogo ya faraja kwao, kikubwa kuliko yote ni kuendelea kuenzi mafanikio na tunu ya Muungano kwa kuwa mambo mengi yamefanyika

Tunaishukuru Serikali kwa kuendelea kudumisha Muungano huu, tuendelee kufanya kazi kwa bidii na kuendelea kushirikiana na Serikali katika kufanikisha mipango mbalimbali ya kuleta maendeleo katika nchi” aliongeza Mkurugenzi huyo kwa kusema

Baadhi ya Wagonjwa,wanawake na wajawazito waliojifungua watoto wameushukuru Uongozi wa Wilaya ya Makete kwa kuwapa zawadi kupitia siku hii muhimu kwa Taifa huku wakimpongeza Rais Samia Suluhu Hassan kwa kazi kubwa ya kuongeza Vituo vya kutolea huduma za Afya katika Wilaya ya Makete na kuboresha upatikanaji wa huduma muhimu katika Hospitali hiyo ikiwemo Dawa.

Mwenyekiti wa Chama cha Mapinduzi (CCM) Mkoa wa Njombe Ndg. Jaseri Mwamwala aliungana na wanamakete kufanya usafi na kugawa zawadi kwa wagonjwa Hospitalini hapo, ambapo amesema watanzania wanasherekea Muungano sambamba na Maendeleo yanayoletwa na Serikali katika wilaya ya Makete na Mkoa wa Njombe kwa ujumla