MADIWANI HALMASHAURI YA WILAYA YA MAKETE, WAWASILISHA TAARIFA ZA UTEKELEZAJI WA MIRADI KATIKA KATA KWA ROBO YA PILI

Tarehe Iliyowekwa: February 15th, 2024

Baraza la Madiwani la Halmashauri ya WIilaya ya Makete, leo Februari 15, 2024, limekaa kikao cha Robo ya Pili cha kujadili taarifa mbalimbali za Utekelezaji wa Miradi ya maendeleo katika Kata 23, zilizopo katika halmashauri, ikiwa ni mwaka wa fedha wa 2023-2024.

Akizungumza katika kikao hicho mwenyekiti wa Halmashauri ya Wilaya ya Makete, Mhe. Christopher Fungo, amesema kuwa lengo la kikao ni kujadili taarifa za maendeleo ya miradi, na kwamba changamoto kubwa ya ubovu wa barabara ndani ya kata hizo  zimepelekwa kwa mamlaka husika ambao ni TARURA ili ziweze kutafutiwa ufumbuzi.

“ubovu mkubwa wa barabara zetu umepelekea kukosa mapato kwa kiasi kikubwa, hivyo changamoto hii imewasilishwa kwa mamlaka husika, na nyinyi madiwani mna nafasi ya kuwafuata hawa watu ili muweze kuongea kwa kina namna bora ya uboreshaji wa barabara katika kata zenu” Alisema Mhe. Fungo.

Kwa upande wake, Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amesema kuwa mpango wa halmashauri ni kuhakikisha zile barabara muhimu zote zinaingizwa TANROAD, ili ziweze kutengewa bajeti kubwa ambayo itarahihisha usafiri pamoja na ukusanyaji wa mapato, tofauti na bajeti za TARURA. 

Sambamba na hayo, Ndg. Makufwe, amesema kuwa, kutofanyika kwa vikao vya kisheria katika mji mdogo wa Iwawa uliopo halmashauri ya Wilaya ya Makete, ni kutokana na ufinyu wa mapato katika halmashauri hiyo sambamba na muingiliano wa majukumu yaliyo nje ya bajeti na kupelekea kupungua kwa mapato.

Nao baadhi ya Madiwani, wa Halmashauri ya Wilaya ya Makete, wameiomba TARURA, kuhakikisha kuwa wanaboresha barabara zote zilizopo katika halmashauri hiyo ili mapato yaweze kupatikana, na kuboresha huduma za wananchi katika maeneo yao, ikiwa ni pamoja na kuziomba baadhi ya barabara kuingia kwenye mamlaka za TANROAD.

Ikumbukwe kuwa, kikao cha Baraza la Madiwani, cha kupitia na Kujadili taarifa za Miradi ya Maendeleo ya Kata, hufanyika kila baada ya robo kukamilika, ili kujadili namna Bora ya Utekelezaji wa Miradi hiyo.

Imeandaliwa na:

Kitengo cha Mawasiliano, 

Halmashauri ya Wilaya ya Makete.