MAFUNDI FUATENI VIPIMO UJENZI WA MADARASA NA KUHAKIKISHA UBORA WA MAJENGO-DC SWEDA

Tarehe Iliyowekwa: November 1st, 2022

Mkuu wa Wilaya ya Makete Mhe. Juma Sweda amemuagiza mkandarasi anayejenga darasa shule ya Msingi Missiwa kufuata vipimo vya BOQ kama inavyotakiwa

Ametoa agizo hilo tarehe 31 Octoba, 2022 baada ya kufika shuleni hapo akiambatana na Mhandishi wa ujenzi kutoka Halmashauri kwa lengo la kukagua ujenzi wa madarasa mbalimbali yanayojengwa kwa fedha za pochi la Mama Mhe. Rais Samia Suluhu Hassan ambapo shule ya Msingi Missiwa imepokea Milioni 20 kwa ajili ya kujenga darasa moja.

BONYEZA HAPA KUTAZAMA VIDEO

Mhe. Sweda amebaini upungufu wa vipimo kwenye ujenzi wa darasa hilo linalojengwa na mkandarasi Peter Mwangira, amemtaka kufuata vipimo vilivyopo kwenye mchoro wa jengo kama ilivyo ujenzi unaofanyika madarasa mengine.

“Mkandarasi tumepima hapa pamoja na wewe tumebaini upungufu wa vipimo, sasa bomoa hapa ongeza vipimo kama ramani inavyoelekeza kwa mujibu wa utaratibu vinginevyo hatuwezi kufanya malipo wakati kazi unayofanya sio yenyewe”.

Mkandarasi huyo amekiri makosa yaliyojitokeza na kukubali kubomoa ili kuongeza sehemu iliyopungua urefu wa jengo.

Pia Mkuu wa Wilaya hiyo ameagiza kununuliwa vifaa vyote vya ujenzi ili kupunguza gharama za usafiri na kurahisisha usafirishaji kabla msimu wa mvua kuanza.

Wakati huohuo amewaagiza wasimamizi wote wa miradi hiyo inayojengwa kwenye shule za Msingi na Sekondari Wilaya ya Makete kuhakikisha inakamilika tarehe 25 mwezi Novemba 2022.