MAJENGO YAKAMILIKE IFIKAPO NOVEMBA 30, 2023 - DED MAKETE

Tarehe Iliyowekwa: November 15th, 2023

Mkurugenzi Mtendaji wa Halmashauri ya Wilaya ya Makete Ndg. William M. Makufwe, amemuagiza mkuu wa Shule ya Sekondari Makete,iliyopo kijiji cha Mbela, Kata ya Mlondwe, kuhakikisha ujenzi wa majengo yote ambayo yameshalipiwa fedha, yanakamilika ifikapo Novemba 30, 2023.

Ndg. William M. Makufwe amesema hayo leo November 15, 2023, wakati ametembelea na kukagua, ujenzi wa Maabara, Maktaba, Nyumba ya watumishi mbili kwa moja, Jengo la utawala na TEHAMA, katika shule ya Sekondari Makete, yanayojengwa kwa kutumia mapato ya ndani.

“tarehe 2/12/2023 nitakuja kuangalia kama mmekamilisha miradi yote hii ambayo inafanyika hapa, ili ifikapo mwezi wa kwanza watoto wanaoanza kidato cha kwanza, waanze kuyatumia majengo haya, hivyo basi sitegemei kuona ucheleweshwaji, ikiwa fedha zote mmeshawekewa kwenye akaunti zenu za shule” Alisema Ndg. Makufwe.

Aidha, Ndg. Makufwe, ameonesha kutoridhishwa na ujenzi wa baadhi ya mafundi, ambao wamekuwa wakijenga majengo ya Maktaba na Maabara, na kuwataka kuzingatia uweledi na uzoefu katika kazi, ili majengo yawe na mwonekano mzuri na yenye kuzingatia viwango vya serikali.

Sambamba na hayo, Ndg, William M. Makufwe, ameagiza kuanza kwa ujenzi wa Bweni la wanafunzi haraka iwezekanavyo, ili ifikapo mwezi wa Kwanza wanafunzi wote wakae shuleni, ikiwa ni njia mojawapo ya kuwakinga watoto wakike na changamoto za unyanyasaji.

Ikumbukwe kuwa, ukamilishaji wa shule ya Sekondari Makete, umetumia mapato ya ndani, ambapo kiasi cha shilingi milioni 146,000,000.00 kimetolewa ili kukamimisha ujenzi huo wa, Maabara ya Fizikia, Baolojia, Kemia, matundu 10 ya vyoo, Jengo la Maktaba, Jengo la TEHAMA pamoja na Jengo la Utawala.

Imeandaliwa na:

Kitengo cha Mawasiliano Serikalini.

Halmashauri ya Wilaya ya Makete.