MAKETE DC YAPATA HATI SAFI, KUTOKA KWA MDHIBITI NA MKAGUZI MKUU WA HESABU ZA SERIKALI

Tarehe Iliyowekwa: June 18th, 2025

Katibu Tawala wa Mkoa wa Njombe, Bi. Judica Omari, ameipongeza Halmashauri ya Wilaya ya Makete, kwa kupewa Hati Safi ya Matumizi ya fedha za miradi, kutoka kwa Mdhibiti na Mkaguzi Mkuu wa Hesabu za Serikali.

Hayo yamebainishwa leo June 18,2025, wakati wa Mkutano Maalumu wa Baraza la Madiwani la Kupokea na Kujadili taarifa ya Hoja za Mdhibiti na Mkaguzi na Mkuu wa Hesabu za Serikali, mara baada ya baraza hilo kuridhia hoja hizo na zifanyiwe kazi.

“Niwapongeze sana wataalamu,Waheshimiwa Madiwani, na watumishi wote wa Halmashauri ya Wilaya ya Makete, kwa kupata Hati Safi, kutokana na ushirikiano wenu mzuri katika ufanyaji kazi, pia niwaombe hizi hoja zilizopo ikiwezekani ziishe kabisa” amesema Bi. Judica Omari.

Aidha, Katibu Tawala wa Mkoa wa Njombe, amewataka wataalam kutambua namna bora ya kuzitatua hoja hizo ambazo zimekuwa zikijitokeza katika utendaji kazi wa kila siku, ikiwa ni pamoja na kuwa mpango kazi unaotekelezeka.

Naye, Mkuu wa Wilaya ya Makete, Mhe, Kissa Gwakisa Kasongwa, amewapongeza waheshimiwa madiwani kwa kuitumikia Halmashauri ya Wilaya ya Makete kwa uaminifu, na kuwatakia heri katika Uchaguzi mkuu unaokuja mwishoni mwaka huu wa 2025.

Kwa Upande wake, Mwenyekiti wa Chama cha Mapinduzi, Ndg. Clemence Mwawite Ngajilo, amewataka waheshimiwa madiwani kuendelea kuisemea vizuri serikali ya Jamhuri ya Muungano wa Tanzania, kutokana na utekelezaji mzuri wa miradi.

Akihitimisha Mkutano huo Maalumu wa Baraza la Madiwani wa Kupokea na Kujadili taarifa ya Hoja za Mdhibiti na Mkaguzi Mkuu Wa Hesabu za Serikali (CAG), Mwenyekiti wa Halmashauri ya Wilaya ya Makete, Mhe. Christopher Y. Fungo, amewashukuru watumishi wote wa Halmashauri ya Wilaya ya Makete, kwa kuwapa ushirikiano mzuri tangu wameingia kama Madiwani katika baraza hilo.