MAKETE YAANZA UWEKEZAJI KWENYE VIWANDA

Tarehe Iliyowekwa: November 4th, 2022

Wanamakete wakaribishwa kuwekeza nyumbani katika ujenzi wa nyumba bora za Kisasa kwa kutumia tofali za mchanga na saruji kwa kuwa miundombinu imeshaandaliwa kwa ajili kupunguza gharama za ujenzi.

Rai hiyo imetolewa na Mkuu wa Wilaya ya Makete Mhe. Juma Sweda mbele ya Makamu Mwenyekiti wa Halmashauri ya Wilaya Mhe. Hawa Kader, Mkurugenzi Mtendaji William Makufwe, Waheshimiwa Madiwani na wakuu wa Idara na Vitengo walipotembelea Kiwanda cha kutengeneza Tofali Makete Mjini mwanzoni mwa mwezi Noveomba , 2022.

“Niwasihi wanamakete waliopo ndani na nje ya Wilaya tujenge numba za Kisasa kwa kuwa wenzetu walishatoa wazo na limefanyiwa kazi katika kupunguza gharama za uwekezaji na ujenzi katika maeneo yetu hivyo ni fursa muhimu tuitumie kujenga nyumba za kisasa”.

KUTAZAMA VIDEO BONYEZA HAPA

Awali Kaimu Mkuu Idara ya Ujenzi Wilaya ya Makete Bw. Emily Maganga akiwaeleza waheshimiwa Madiwani kuhusu mradi huo amesema Halmashauri imefanikiwa kununua mtambo huo kwa shilingi Milioni 41 kwa lengo la kutengeneza Tofali ambazo zimekuwa zikinunuliwa Makambako au Mbeya jambo ambalo limefanya wananchi wengi wa Makete kushindwa kujenga nyumba za Kisasa.

“Halmashauri imeanzisha mradi huuu kwa ajili ya kupunguza gharama za ujenzi lakini pia kuwasaidia wananchi waweze kujenga nyumba zao kwa gharama nafuu kwa sababu mahitaji mbalimbali sisi tutakuwa tunawaandalia hapa kwa gharama nafuu sana tofauti na hali ilivyo sasa”.

Mkurugenzi Mtendaji Halmashauri ya Wilaya ya Makete William Makufwe amesema matamanio ya mradi huo ni kufanya uzalishaji mkubwa wa Tofali ambapo kwa siku wataweza kutengeneza tofali zisizopungua elfu 4 na zitauzwa pia kwa wananchi wenye uhitaji.

“Waheshimiwa Madiwani mradi huu ni mkubwa na utaweza kusaidia kupunguza gharama za ujenzi wa Miradi ya Serikali lakini pia mwananchi anaweza kujenga kwa gharama nafuu kwa kuwa tofali atazinunua hapa na anaweza kupewa mtaalamu mshauri kwa gharama nafuu ili aweze kujenga nyumba bora na imara”.

Makamu Mwenyekiti wa Halmashauri ya Wilaya ya Makete Mhe. Hawa Kader amewapongeza watendaji wa Serikali kwa kubuni mradi huo ambao unakwenda kutoa ajira kwa vijana na kuongeza wigo wa upatikanaji wa Mapato kwa Halmashauri wakati wote.