MAMLAKA YA AFYA YA MIMEA NA VIUATILIFU YAKABIDHI LITA 700 ZA DAWA WILAYANI MAKETE, KWAAJILI YA WAKULIMA WA VIAZI

Tarehe Iliyowekwa: February 12th, 2024

Mamlaka ya Afya ya Mimea na Viuatilifu, leo Februari 12,2024 imekabidhi lita 700 za viuatilifu kwa Halmashauri ya Wilaya ya Makete, kwajili ya kuulia wadudu waharibifu kwenye Mazao ya viazi mviringo, mara baada ya kutokea kwa uharibifu huo   kwenye maeneo ya kata za Matamba, Ikuwo, Kigala na kinyika pamoja na maeneo mengine  wilayani Makete.

Akizungumza mara baada ya kukabidhi viuatilifu hivyo, Afisa Kilimo Mwandamizi kutoka Mamlaka ya Afya ya Mimea na Viuatilifu, nchini Tanzania, Bi. Cecilia E. Mrosso, amesema lengo la kuleta dawa hizo ni kumsaidia mkulima kupambana na wadudu waharibufu wa Mazao, ili nchi iweze kupata Mazao ya kutosha pamoja na kukuza uchumi wa wakulima hao.

Aidha, Bi. Cecilia, amewataka wakulima kufuata ushauri wa kitaalmu katika kunyunyizia viuatilifu hivyo kwenye mimea hiyo ya viazi kutokana na eneo la Makete kuwa ni oevu, ili wadudu hao waweze kufa, pamoja na kuwa na tija katika zao hilo.

Naye, Mkurugenzi Mtendaji wa Halmashauri ya Wilaya ya Makate, Ndg, William M. Makufwe, ameishukuru serikali ya Jamhuri ya Muungano wa Tanzania, kwa kuwaletea viuatilifu hivyo, ambavyo vitakuwa msaada mkubwa kwa wakulima ili kunusuru uchumi wa wakulima hao, baada ya wadudu kuathiri zao hilo kwa sehemu kubwa.

“tumeathirika sana, kuna baadhi ya maeneo zaidi ya ekari 700 za viazi zimeliwa na wadudu, hivyo basi kwa kutuletea hii dawa leo, mmetuokoa sana kwakuwa kuna baadhi ya wakulima hawana uwezo wa kununua dawa hizi, na kwamba leo Februari 12, 2024, dawa hizi zitapelekwa kwa wakulima” Alisema Ndg. Makufwe.

Sambamba na hayo, Ndg. Makufwe, amewataka Maafisa Kilimo, kuhakikisha kuwa wanasimamia pamoja na kuratibu zoezi la upuliziaji dawa kwa ukaribu namna bora, ili kunusuru Mazao hayo.

Ikumbukwe kuwa, wakulima Mazao ya viazi katika kata za Matamba, Ikuwo, kigala, Kinyika na maeneo mengine, wameathirika kwa sehemu kubwa,  baada ya wadudu kuharibu mimea hiyo na kupelekea uzalishaji wa zao hilo kudorola.

Imeandaliwa na: 

Kitengo cha Mawasiliano Serikalini, 

Halmashauri ya Wilaya ya Makete.