MARUFUKU KUCHINJA NGURUWE TANDALA

Tarehe Iliyowekwa: August 20th, 2022

Afisa mifugo na uvuvi Wilaya ya Makete Bwana. Aldo Mwapiga amepiga marufuku wananchi kuchinja nguruwe na kula nyama kuanzia sasa kwa muda usiojulikana kwa kile alichosema ni uwepo wa homa ya nguruwe.

Imeelezwa kuwa ni nguruwe 21 wamekufa kwa muda wa miezi kadhaa iliyopita katika Kijiji cha Tandala kata ya Tandala Wilayani Makete hivyo imelazimu mamlaka kuweka zuio la kuchinja na kula nyama ya nguruwe.

Siku kadhaa baada ya kuzuiwa kuchinja nguruwe kutokana na uwepo wa homa ya nguruwe katika eneo la Tandala wilayani Makete mkoani Njombe, imebainika kuwa wapo baadhi ya watu wanafukua nguruwe waliokufa na kufukiwa kisha kuwachinja na kwenda kuuza nyama vilabuni nyakati za usiku

Bw. Mwapinga amesema kutokana na kuwepo kwa ugonjwa huo, Serikali imesitisha uchinjaji wa nguruwe, kuhamisha nguruwe kutoka sehemu moja kwenda nyingine kwa ajili ya nguruwe dume kupanda majike ikiwa ni njia mojawapo za kukabiliana na ugonjwa huo, na pindi utakapokwisha zuio hilo wataliondoa

Amewaomba wananchi kutoa ushirikiano pamoja na kutekeleza maagizo yote yanayotolewa na wataalamu wa mifugo ikiwemo kuacha kufukua nguruwe waliofukiwa baada ya kufa na kisha kuwachinja na kwenda kuuza nyama hizo vilabuni nyakati za usiku jambo ambalo limetendeka katika kitongoji cha Singida kijiji cha Tandala.