MHE. SWEDA AKABIDHI OFISI KWA MKUU WA WILAYA MPYA WA MAKETE MHE. KISSA GWAKISA KASONGWA

Tarehe Iliyowekwa: January 28th, 2025

Aliyekuwa Mkuu wa Wilaya ya Makete Mhe. Juma S. Sweda,leo Januari 28,2025, amekabidhi ofisi kwa Mkuu wa Wilaya mpya wa Wilaya ya hiyo Mhe. Kissa Gwakisa Kasongwa, ikiwa ni siku nne tangu Rais wa Jamhuri ya Muungano wa Tanzania Mhe. Dkt. Samia Suluhu Hassan kufanya uhamisho wa wakuu wa Wilaya na wakurugenzi Watendaji wa Halmashauri hapa nchini.

Hafla hiyo ya kukabidhi Ofisi imefanyika katika Ukumbi wa mikutano wa Bomani, Uliopo katika makao makuu ya Halmashauri ya Wilaya ya Makete, ambapo Mhe. Sweda, amemtakia heri katika utendaji wake wa kazi ndani ya Wilaya ya Makete, kutokana na uwepo wa wenyeji ambao ni wakarimu na wachapa kazi.

“Makete ina watu wakarimu sana, nimefanya kazi hapa bila kuwa na changamoto yeyote, hivyo naamini hata wewe upo katika mikono salama, na utapata ushirikiano wa kutosha kutokana na kasumba ya wakazi wa wilaya hii kupenda kufanya kazi kwa bidii” alisema Sweda.

Kwa upande wake Mkuu mpya wa Wilaya ya Makete, Mhe. Kissa Gwakisa Kasongwa, mara baada ya kukaribishwa ndani ya Wilaya hiyo, amesema kuwa kipaumbele chake ni kuona vijana wanapata fursa za kupambania ndoto zao za kimaisha ikiwa ni pamoja na kuwawekekea mazingira mazuri ya kuwekeza nyumbani.

Sambamba na hayo, Mhe. Kissa, amewashurukuru wanamakete kwa kumpokea kwa mikono miwili na kwamba atahakikisha anaendeleza yale mazuri ambayo yamefanywa na Mhe. Sweda, na kusimamia miradi ya maendeleo pamoja na utekelezaji wa ilani ya Chama cha Mapinduzi.  

Aidha, Mwenyekiti wa Halmashauri ya Wilaya ya Makete, Mhe. Christopher Y. Fungo, amesema kuwa wao kama Halmashauri wataendeleza ushirikiano mzuri na  Ofisi ya Mkuu wa Wilaya, ili Wilaya ya Makete iweze kukua kiuchumi.

Naye, Kaimu Mkurugenzi Mtendaji wa Halmashauri ya Wilaya ya Makete, Ndg. Humphrey Mushi, amesema kuwa, limekuwa pigo kubwa kuondokewa na viongozi wawili kwa wakati mmoja , hivyo halmashauri inampongeza kwa kuendelea kuaminiwa na Serikali ya Jamhuri ya Muungano wa Tanzania, kwa kuhamishiwa majukumu yake katika Wilaya ya Njombe.

Ikumbukwe kuwa, aliyekuwa Mkuu wa Wilaya ya Makete, Mhe. Juma S. Sweda, amehamishiwa katika Wilaya ya Njombe, mara baada ya kuitumikia wilaya ya Makete, kwa zaidi ya miaka minne, ambapo aliyekuwa Mkuu wa Wilaya hiyo, Mhe. Kissa Gwakisa Kasongwa amehamishiwa Wilaya ya Makete.