MIL. 82,175,000 KUJENGA BARABARA KIJIJI CHA IVILIKINGE

Tarehe Iliyowekwa: October 3rd, 2022

Mbunge Jimbo la Makete amekagua ujenzi wa Barabara yenye urefu wa Kilomita 3.2 inayojengwa na Mkandarasi GS kijiji cha Ivilikinge Kata ya Isapulano.

Barabara hiyo inayojengwa na kuwekwa kifusi inagharimu kiasi cha shilingi Milioni themanini na mbili laki moja sabini na tano elfu (82,175,000) fedha kutoka Serikalini kupitia TARURA.

Mbunge Jimbo la Makete Mhe. Festo Sanga ameishukuru Serikali kusikia kilio cha wananchi wa kijij cha Ivilikinge na Unyangogo ambao ni watumiaji wakubwa kulungana na kuwa wakulima wakubwa wa zao la viazi mviringo na wafugaji wa Ng’ombe wa maziwa.

Mhe. Sanga amesema “Wananchi wameomba barabara hii kwa muda mrefu na sasa Serikali sikivu chini ya Rais Samia Suluhu Hassan imesikia maombi ya wananchi na imeanza utekelezaji, tunampongeza Rais kwa kuwajali na kuwasikiliza wananchi wako huku vijijini”.

Kwa upande wake Mhandisi Peter John Kawogo amesema Serikali kupitia TARURA imetenga fedha nyingi kwa Wilaya ya Makete zitakazosaidia kujenga barabara nyingi za Vijijini katika Jimbo la Makete kwa kiwango cha kifusi na kusaidia kupitika wakati wote.

“Ujenzi umeanza katika maeneo mbalimbali sambamba na hapa Ivilikinge, Mang’oto Kijiji cha Ibaga ambako wananchi walikuwa wanashindwa kufanya shughuli za usafirishaji mazao, Barabara ya Isapulano-Nkenja n ahata kule Mbalatse mkandarasi anakwenda siku siyo nyingi kabla ya msimu wa mvua kuanza”

Estini Asakwe Tweve mwananchi kutoka Kijiji cha Ivilikinge amesema Serikali imewaona wananchi hao kwa ujenzi wa barabara hiyo ambayo ilikuwa haipitiki msimu wa mvua unapoanza mpaka unapoisha.

“Tunakushukuru sana Mheshimiwa Mbunge kwa namna ambavyo umekuwa ukifika hapa kwenye mikutano na kusikiliza ombi letu la barabara, lakini tunaomba utufikishie shukrani zetu kwa Mkuu wa Wilaya na Mheshimiwa Rais Samia kwa kujali wananchi wa vijijini kama sisi”