MILIONI 170 ZINAJENGA BWALO MANG'OTO SEKONDARI

Tarehe Iliyowekwa: October 22nd, 2022

Serikali kupitia TASAF inajenga bwalo kubwa shule ya Sekondari Mang’oto iliyopo Kata ya Mang’oto kwa gharama ya zaidi ya Milioni 170.

Mratibu wa TASAF Wilaya ya Makete Henry Nyigu akizungumza mbele ya Kamati ya fedha, Mipango na Utawala ilipotembelea kukagua miradi mbalimbali ya maendeleo katika Kata ya Mang’oto amesema Serikali inatekeleza mradi huo wa ujenzi kwa gharama ya zaidi ya milioni 170 huku wananchi pia wakisaidia nguvu kazi.

BONYEZA HAPA KUTAZAMA VIDEO

“Mradi huu unatekelezwa kwa Zaidi ya Milioni 170 na wananchi kutoka vijiji viwili wanasaidia nguvu kazi kuhakikisha mradi huu unakamilika na wanafunzi waweze kupata sehemu nzuri ya kufanyia shughuli zao kama kula Chakula au sherehe”

Kazi hii ilianza mwezi wan ne mwaka huu lakini changamoto zilikuwepo ikiwepo wananchi kupunguza nguvu kazi, tunauhakika kazi itakamilika na sasa tupo katika hatua nzuri kwenye ujenzi- Aliongeza Nyigu

Mheshimiwa Diwani Kata ya Mlondwe Alphonse Salimo ambaye ni mjumbe wa Kamati ya Fedha mipango na Utawala amewapongeza wasimamizi wa mradi huo kwa usimamizi wa karibu kuhakikisha mradi unatekelezwa kwa kiwango kinachostahili.

“Niwapongeze sana wasimamizi wa huu mradi mkubwa katika shule hii ya Sekondari, kwa sababu watoto wetu wanapata eneo zuri wakati wa kula chakula na hata wanapofanya sherehe zao”

Mheshimiwa Diwani Kata ya Lupila Ernesta Lwilla amewapongeza wananchi wa Kata ya Mang’oto kwa ushirikiano walionao katika ujenzi wa bwalo hilo huku akiwasihi kuendelea kushirikiana katika kuhakikisha jingo hilo linakamilika kama ilivyopangwa.

“Niwashukuru wananchi kwa kujitoa kwenu katika kuhakikisha mradi huu umefikia hatua hii kubwa, niwaombe muendelee kushirikiana mpaka mwisho ili kukamilisha mradi huu muhimu kwa wanafunzi wetu”.