MILIONI 800 KUJENGA VITUO VIWILI VYA AFYA MAKETE

Tarehe Iliyowekwa: August 30th, 2022

Halmashauri ya Wilaya ya Makete kwa mwaka wa fedha 2022/2023 imepanga kujenga vituo viwili vya Afya kwa shilingi Milioni 800 katika Kata ya Mbalatse na Mfumbi

Akizungumza na wananchi wa Mbalatse Mkurugenzi Mtendaji Wilaya Bw. William Makufwe amesema Baraza la Madiwani limeridhia kujengwa Kituo cha Afya kwa shilingi Milioni 400 Kata ya Mbalatse na Milioni 400 Kata ya Mfumbi ili kusogeza huduma za Afya karibu na wananchi

“Katika kuhakikisha wananchi mnapata huduma za Afya karibu na makazi yenu waheshimiwa Madiwani kwa kushirikiana na Mbunge na Serikali yetu ya awamu ya sita wameamua kuleta hapa milioni 400 kujenga kituo cha Afya Mbalatse na tayari fedha zimeshawekwa kwenye account ya Kata anzeni kujenga kutuo hapa”

“Lakini pia tunajenga Kituo cha Afya Kata ya Mfumbi kwa milioni 400…hizi ni fedha za Mapato ya ndani ya Halmashauri, niwaombe wananchi kusimamia mapato yasitoroshwe na aiwepo mtu wa kuhujumu ili tuyafanikishe haya kuwasaidia mpate huduma karibu zaidi”

KUTAZAMA VIDEO BONYEZA HAPA https://youtu.be/1ZsMJeFLuhA

Mtendaji wa Kata ya Mbalatse Evelina Sanga amesema wananchi wa Kata ya Mbalatse wamefurahi kupokea fedha hizo na kuongeza nguvu kazi tayari wameanza kufyatua tofali elfu arobaini kwa ajili ya kuanza ujenzi huo nae neo lenye ekari zaidi ya 30 limetengwa kwa ujenzi huo.

“Wananchi kutoka vijiji vitatu vya Kata ya Mbalatse ambavyo ni Mbalatse, Kisasatu na Lupombwe ambao wameanza kuandaa tofali elfu arobani ili ujenzi utakapoanza tusihangaike kuanza kutafuta tofali”.

Wananchi wa Kata ya Mbalatse wameishukuru Serikali Halmashauri ya Wilaya ya Makete kwa kuwapatia fedha kiasi cha shilingi Milioni 400 kwa ajili ya ujenzi wa Kituo cha Afya

Wananchi hao ni Veronica Mdete na Fredrick Msigwa wamesema ujenzi wa Kituo hicho unakwenda kusaidia kina mama wajawazito na wazee ambao wamekuwa wakihangaika kwa muda mrefu sasa wakifuata huduma Wilaya ya Wanging’ombe au Hospitali ya Ikonda kwa zaidi ya Kilomita 40

“Tunasafiri kufuata huduma za Afya Kata ya Kipengere iliyopo Wilaya ya Wanging’ombe au Hospitali ya Ikonda na hatuna uwezo mkubwa wa kukodi magari lakini ujio wa Kituo hiki utatupunguzia changamoto ya kusafiri umbali mrefu kutafuta huduma za Afya”

Veronica ameongeza kwa kumpongeza Mbunge Jimbo la Makete Mhe. Festo Sanga, Diwani wa Kata ya Mbalatse na Viongozi wa Halmashauri kwa kuwapelekea fedha kata ya Mbalatse ili wajenge Kituo hicho cha Afya.

Diwani Kata ya Mbalatse Mhe. Raymond Mgaya sambamba na kuishukuru Serikali amewaomba wananchi wa Kata ya Mbalatse kuanza kusogeza tofali karibu na  eneo lililopendekezwa kujenga Kituo hicho mapema wiki hii