MJADALA WAIBUKA KWENYE BARAZA LA MADIWANI KUHUSU BARABARA ZA TARURA MAKETE

Tarehe Iliyowekwa: November 1st, 2022

Mjadala kuhusu changamoto ya barabara katika maeneo mbalimbali Wilayani makete zinazosimamiwa na TARURA umeibuka kwenye baraza la Madiwani na kuwaomba Tarura kuimarisha barabara za kimkakati zaidi.

Wakiwa kwenye Kikao cha Baraza la Madiwani tarehe 1 Novemba, 2022 waheshimiwa madiwani kutoka kata mbalimbali pamoja na kuwapongeza Tarura kwa ukarabati wa barabara katika maeneo kofofi, wamewasihi kushughulikia barabara kwa mtandao mrefu angalau kuanzia Kilometa 3 na zaidi tofauti na ilivyo sasa ya kushughulikia Mita 600 au 700.

BONYEZA HAPA KUTAZAMA VIDEO

Waheshimiwa Madiwani wamesema hali hiyo inaweza kuongeza matatizo katika baadhi ya maeneo na kutumia gharama kubwa kwa wakandarasi kusafirisha mitambo kwenda kushughulikia eneo dogo.

Diwani wa Kata ya Matamba Mhe. Saineli Nyambo amemuomba Meneja wa Tarura Wilaya ya Makete kufanya matengenezo ya haraka barabara ya Kinyika-Kikondo, Matamba-Kitekelo mpaka Chimala ili kuondoa upotevu wa mapato ambayo yamekua yakipotea kupitia changamoto ya ya barabara hiyo msimu wa mavuno.

Akijibu hoja hiyo kaimu  Meneja wa Tarura Wilaya ya Makete Mhandisi John Kawogo amekiri ubovu wa barabara hizo muhimu kwa uchumi wa Wilaya huku akisema mpango wa Tarura ni kuzifungua barabara hizo pindi watakapo pata fedha lakini  kwa sasa wamepata fedha kidogo  za kufanya matengenezo katika maeneo ukorofi sana.

Kwa upande wake Mkurugenzi Mtendaji Halmashauri ya (W) Makete Willium Makufwe ameomba kuwepo na mpango wa kujenga barabara chache za kimkakati zitakazoleta tija ambazo TARURA wanaweza kufanya matengenezo makubwa ili kuondoa upotevu wa mapato.

Baraza la madiwani litaendelea tena tarehe 2 Novemba, 2022 ambapo Madiwani watapata fursa ya kutembelea kiwanda cha kutengeneza tofali kinachomilikiwa na Halmashauri pamoja na kukabidhiwa gari kubwa lori jipya lililonunuliwa na Halmashauri ya Wilaya ya Makete kwa ajili ya shughuli mbalimbali za ujenzi.