MKURUGENZI MAKETE AWATAKA WATUMISHI WA UMMA KUTOKUWA CHANZO CHA MIGOGORO

Tarehe Iliyowekwa: January 18th, 2024

Mkurugenzi Mtendaji wa Halmashauri ya Wilaya ya Makete Ndg. William M. Makufwe, leo Januari 18/2024, ameendelea ziara ya Ukaguzi wa uandikishaji wa wanafunzi kuanzia ngazi ya Awali, Msingi na Sekondari, pamoja na kusikiliza kero kupitia Kamati za Maendeleo ya Kata, katika kata mbili za Iniho na Luwumbu.

Akiwa katika ziara hiyo, Ndg. William M. Makufwe, amewataka viongozi wote kuanzia ngazi za vitongoji kushirikiana na watumishi wote wa serikali ambao wamepelekwa kwenye maeneo yao na si kuwa chanzo cha Migogoro, sambamba Usimamizi wa ukusanyaji wa Mapato ili serikali iendelee kuwapelekea miradi ya maendeleo.

Aidha, Ndg. Makufwe, amewaasa wasimamizi wa Taasisi za Elimu na Afya, kuilinda na kuisimamia vizuri miradi inayotekelezwa, na ambayo imekamilika ili iweze kuwa na faida kwa kizazi cha sasa na baadae, kwakuwa imetumia Fedha nyingi hadi kukamilika kwake.

Sambamba na hayo, Ndg. Makufwe, amewataka viongozi hao kuwa wa mfano katika kupambana na Udumavu kwenye maeneo yao, kwa kufuata maelekezo ambayo yamekuwa yakitolewa na Maafisa Lishe , ili Tanzania iwe na kizazi Bora cha sasa na baadae. 

Naye, Kaimu Afisa Lishe, wa Halmashauri ya Wilaya ya Makete, Bi. Agnes Columbani, amewataka viongozi hao, kuhakikisha kuwa wanasimamia uanzishwaji wa Bustani za Mbogamboga pamoja na Ufugaji wa Kuku na wanyama wadogo wadogo kama vile Sungura, pamoja upandaji wa Miti ya Matunda, sambamba na kusimamia ulaji wa Mlo kamili kwa Watoto wadogo na wajawazito.

Kwa Upande wake, Diwani wa Kata ya Iniho, ambaye pia ni Mwenyekiti wa Halmashauri ya Wilaya ya Makete, Mhe. Christopher Fungo, amemshukuru Mkurugenzi Mtendaji wa Halmashauri hiyo, Kwa kufanya mikutano hiyo ambayo imekuwa na tija, pamoja na kuamua kushuka ngazi za chini kabisa ambazo viongozi wengi wameshindwa kufanya. 

Ikumbukwe kuwa, katika ziara hiyo, Ndg. Makufwe, aliongozana na Afisa Mapato, Ndg. Muyengi Bwire, Afisa Lishe, Bi. Agnes Columbani, ikiwa na lengo la kusikiliza kero za wananchi kupitia KAMAKA, pamoja na wenyeviti wa Vitongoji, sambamba na kukagua Uandikishaji wa wanafunzi kuanzia ngazi ya awali.

Imeandaliwa na :

Kitengo cha Mawasiliano Serikalini.

Halmashauri ya Wilaya ya Makete.

ReplyForward Add reaction