Mkutano wa Wadau wa Ngano kufanyika Makete

Tarehe Iliyowekwa: September 7th, 2022

Halmashauri ya Wilaya ya Makete imeandaa mkutano mkubwa ambao unatarajia kuwakutanisha wadau wa zao la Ngano zaidi ya 300 kwa ajili ya kujadili mipango ya uzalishaji wa zao hilo na upatikanaji wa Soko.

Akizungumza na Wananchi wa Mbalatse mwishoni mwa wiki iliyopita Mkurugenzi Mtendaji Wilaya ya Makete Bw. William Makufwe amesema, Wilaya ya Makete inampango maalumu wa kuanza uzalishaji wa zao la Ngano kwa wingi ili kuhakikisha zao hilo linapatikana kwa wingi Wilayani Makete.

“Kama Halmashauri tumejipanga kufanya kilimo cha ngano kama kilimo biashara kwa kuhakikisha wananchi wetu wanalima ngano kwa wingi na wanazalisha kwa tija”

“Tuombe wananchi hapa Mbalatse kama mnaweza kutupa eneo hata tupate ekari zaidi ya 200 sisi tupo tayari kuwekeza, lakini hata ninyi wananchi limeni ngano kwa wingi kwa kuwa Serikali imeweka ruzuku ya Mbolea pia itagawa mbegu kwa wananchi hii ni fursa kubwa sana”

Akiwa Kata ya Kigala Afisa Kilimo Wilaya ya Makete Ndg. Aniseti Ndunguru amesema upatikanaji wa maeneo mengi ya uzalishaji wa zao la Ngano katika Wilaya ya Makete utawezesha zao hilo kuzalishwa kwa wingi na kupunguza adha ya uhaba wa ngano nchini.