MKUU WA MKOA WA NJOMBE AMPONGEZA MKURUGENZI KWA UBUNIFU

Tarehe Iliyowekwa: March 8th, 2023

Mkuu wa Mkoa wa Njombe Mhe. Antony Mtaka amewapongeza viongozi wa Halmashauri ya Wilaya ya Makete kwa ubunifu wa miradi mbalimbali ikiwemo kilimo cha zao la Ngano.

Pongezi hizo alizitoa Machi 7, 2023 akiwa kwenye Kikao kazi kati ya Maafisa Ugani na Kilimo sambamba na wataalamu kutoka Chuo Kikuu cha Kilimo SUA.

Mhe. Mtaka amesema ubunifu wa Miradi unaofanywa na Viongozi wa Halmashauri ya Wilaya ya Makete ni wa Kipekee ukilinganisha na uhalisia wa Ukusanyaji Mapato ambao pia umeendelea kuongezeka kila siku.

Mkurugenzi Mtendaji Halmashauri ya Wilaya ya Makete Wiliam Makufwe alisema Halmashauri imetenga zaidi ya shilingi Milioni 200 kwa mwaka wa fedha 2023/24 kwa ajili ya mkakati wa kuongeza tija ya uzalishaji wa zao la Ngano Makete.

Kwa upande wao Wanafunzi wataalamu kutoka Chuo Kikuu cha Kilimo SUA Morogoro walishukuru kwa mapokeo mazuri waliyoyapata kutoka Halmashauri ya Wilaya Makete na kuahidi kuwa watawasaidia wakulima wa Wilaya ya Makete ili kuleta mabadiliko yenye tija katika zao la Ngano.