MKUU WA MKOA WA NJOMBE MHE. MTAKA, AWATAKA WAKAZI WA MAKETE KUTAMBUA UMUHIMU WA LISHE BORA KWA WATOTO

Tarehe Iliyowekwa: January 26th, 2024

Mkuu wa Mkoa wa Njombe, Mhe. Antony Mtaka, amewataka wazazi na walezi, Wilayani Makete, kutambua umuhimu wa kuwapa watoto wao Lishe Bora, ili wawe na Afya bora katika makuzi yao.

Mhe. Mtaka amesema hayo leo Januari 26, 2024, akiwa Wilayani Makete, wakati wa Uzinduzi wa Kampeni ya Kuhamasisha Lishe na Mpango wa Kuongeza Kasi ya Kupunguza Udumavu, mkoani Njombe.

"endapo Wazazi wangetambua na kutimiza wajibu wao wa kuhakikisha kuwa wanawalea vizuri Watoto wao kwa kuwanyonyesha, na kuwalisha vyakula vinavyokidhi makundi yote matano na kuacha uvivu, tusingefika hapa tulipo sasa" Alisema Mhe. Mtaka.

Adha, Mhe. Mtaka , ameziagiza Shule zote ziwe na Bustani za mbogamboga na Matunda ili Watoto wawapo Shule waweze kula Chakula Bora chenye mchanganyiko wa makundi yote ya vyakula.

Kwa Upande wake, Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amesema Halmashauri imetoa Elimu kwa wahudumu Afya ngazi ya Jamii, imenunua Ng'ombe wa Maziwa, ikiwa ni pamoja na kuwafuatilia Watoto wote kwa ukaribu wanaozaliwa na uzito pungufu ili kupambana na Udumavu wilayani humo. 

Naye, Mkurugenzi wa Shirika lisilo la Kiserikali, la TAHEA, Bi. Leonida Mng'ong'o , amewataka watumishi wa serikali kushirikiana na Wadau mbalimbali ili kuhakikisha Udumavu unakomeshwa mkoani Njombe.

Hata hivyo, Halmashauri ya Wilaya ya Makete, ilifanya zoezi la Upimaji wa Lishe Kwa Watoto wenye umri chini ya Miaka 5, zaidi ya 7462, katika vijiji 93, na kubaini 32.6% ya Udumavu, uzito mdogo 5.8%na ukondefu 2.8 %.