MKUU WA WILAYA

Tarehe Iliyowekwa: May 12th, 2022

Mkuu wa Wilaya ya Makete Mh. Juma Sweda akiwa kwenye mkutano uliojumuisha viongozi wa dini wa madhehebu mbalimbali amewasihi  kuendelea kuhamasisha waumini kutambua juu ya umuhimu wa zoezi la Sensa pamoja na Anuani za makazi.

Mh. Sweda alitoa rai hiyo kwa Viongozi wa Jukwaa la kikristo Makete walipokutana katika Kanisa Katoliki Makete Mjini kwa lengo la kujadili mambo mbalimbali yanayohusu madhehebu yao ikiwemo kuendelea kusisitiza uwepo wa amani na upendo nchini.

Mkutano huo ulijadili maendeleo ya Jukwaa la kikristo Wilayani Makete sambamba na kuzungumzia zoezi la anuani za makazi pamoja na kuhimiza wananchi kuweka Vibao kwenye nyumba zao.

Mkuu wa Wilaya alisema kwa sasa Serikali imetunga sheria pamoja na adhabu kwa wale ambao hawatazingatia uwekaji wa vibao vya anuani za makazi, hivyo kushindwa kufanya hivyo kwa muda uliopangwa atatakiwa kulipa faini isiyozidi shilingi laki tatu (300,000) au kuhukumiwa kifungo cha miezi sita jela au vyote kwa pamoja.

“Niwaombe wachungaji, Mapadre na viongozi wa dini zote tunapokutana na waumini wetu huko kwenye madhehebu wakati wa ibada na hata nje ya ibada tuwaelimishe kuhusu umuhimu wa Anuani za Makazi na zoezi la Sensa ambalo litafanyika tarehe 23 Agosti 2022 nchi nzima”.

Mwenyekiti wa jukwaa la kikristo wilaya ya Makete Padre Laurian Kayombo alibainisha baadhi ya changamoto ambazo wananchi wamekuwa wakikumbana nazo ili Serikali iweze kuwasidia kuondokana na changamoto hizo ambazo waumini wetu wanakutana nazo ikiwemo kukatika umeme mara kwa mara bila taarifa na kuwasababishia hasara ya kuungua vifaa vyao, Barabara nyingi kutopitika kipindi cha mvua na wananchi kushindwa kufanya shughuli za kiuchumi ikiwemo kupeleka mazao sokoni”.

“Tunakushukuru Mkuu wa Wilaya kwa kuzungumza na viongozi wa Dini, kuhusu zoezi la Anuani za makazi pamoja na Sensa kwani Serikali imekuwa ikituelekeza na tunayafanyia kazi maelekezo hayo tunaamini waumini watazidi kupata elimu kupitia ibada tunazofanya” ameongeza Padre Kayombo.

Akitoa neno la shukrani kwa niaba ya Viongozi wengine Mkuu wa Jimbo la Iwawa KKKT-DKK Mchungaji Mathayo Sanga, amesema wapo tayari kushirikiana na Mkuu wa Wilaya katika kuhimiza zoezi la Anuani za Makazi na Sensa pamoja na kuendelea kuihubiri amani ya nchi katika nyumba za ibada.