MKUU WA WILAYA YA MAKETE AKAGUA UKABARABATI WA SHULE YA SEKONDARI IPELELE

Tarehe Iliyowekwa: January 29th, 2024

Mkuu wa Wilaya ya Makete, Mhe. Juma Sweda, leo Januari 29, 2024, ametembelea na kukagua ukarabati wa Shule ya Sekondari Ipelele, pamoja na familia ambazo nyumba zao zilibomolewa wiki iliyopita kutokana na uwepo wa Upepo mkali uliombatana na mvua kubwa, na kupelekea wanafunzi pamoja familia kadhaa kukosa masomo na mahali pa kuishi.

Akizungumza baada ya ukaguzi huo, Mh. Juma Sweda, akiwa ameambatana na Mkurugenzi Mtendaji wa Halmashauri ya Wilaya ya Makete, Ndg. William Makufwe, amesema kuwa, imewabidi kuchukua maamuzi ya haraka ili wanafunzi waweze kuendelea na masomo ikiwa ni pamoja na kuwanusuru na changamoto za mtaani.

Aidha, Mhe. Sweda , amewapongeza na kuwashukuru wakazi wa Kata ya Ipelele, pamoja na Mwenyekiti wa CCM, Wilaya ya Makete, Ndg. Clemence Ngajilo, kwa kuwa mstari wa mbele katika kuhakikisha kuwa ukarabati wa Majengo hayo unakamikika haraka iwezekanavyo.

Kwa Upande wake, Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amewataka mafundi wanaokarabati majengo hayo, kuhakikisha kuwa kabla ya Januari 31, 2024, wawe wamekamilisha ujenzi huo, ili watoto waweze kurejea Shule haraka iwezekanavyo.

Naye, Mwenyekiti wa Kijiji Cha Mbanga, Ndg. Nelson Fungo, amesema kuwa kwa kushirikiana na wananchi wamefanikiwa kujenga nyumba za muda Saba, ikiwa ni pamoja na kuwachangia Chakula wale wote ambao wamekumbwa na janga hilo.

Nao baadhi ya Wananchi, ambao nyumba zao ziliezuliwa na Upepo mkali, uliombatana na Mvua, akiwemo Bi. Helenida Chaula, Bi. Babhikie Mtepa na Bi. Betina Sanga, wameushukuru Uongozi wa Halmashauri ya Wilaya ya Makete, pamoja na serikali kwa Ujumla, kwa kuwasaidia katika kipindi hiki kigumu, na kuahidi kupanda miti Kwa wingi ili kupunguza Majanga yatokanayo na Upepo mkali.