MKUU WA WILAYA YA MAKETE, AWATAKA WAKUU WA IDARA NA VITENGO KUTATUA KERO ZA WATUMISHI WALIOPO CHINI YAO.

Tarehe Iliyowekwa: March 19th, 2024

Mkuu wa Wilaya ya Makete, Mhe. Juma S. Sweda, leo Machi 19, 2024, amesikiliza na kutatua kero za watumishi wa Halmashauri ya Wilaya ya Makete, ambazo wameziwasilisha kwake wakati wa kikao na watumishi hao, ambacho kimefanyika katika ukumbi wa Bomani uliopo katika halmashauri hiyo.

Akizungumza katika kikao hicho, Mhe. Sweda amesema kuwa, wakuu wa Idara na Vitengo, wametakiwa kuwa makini katika kushughulikia kero za watumishi katika idara zao kutokana na kuwepo kwa baadhi ya malalamiko ambayo yamekuwa ndani ya uwezo wao kimalaka.

“hakikisheni mnatatua kero za watumishi wenu, si busara kila siku mnatatua changamoto zenu bila kusikiliza na kutatua kero za watumishi waliopo chini yenu, ni wajibu wako kama mkuu wa Idara na kitengo kuwapa motisha sambamba na kuwalipa stahiki zao mapema ili kuongeza ufanisi wa kazi” Alisema Mhe. Sweda. Aidha, Mhe. Sweda, amevitaka vyama mbalimbali vya kusimamia maslahi ya watumishi kama vile CWT, kutambuwa kuwa nao ni watumishi wa umma, hivyo wanapaswa kusikiliza pamoja na kushiriki katika vikao mbalimbali vya serikali, sambamba na utiifu kwa serikali ya Jamhuri ya Muungano wa Tanzania.

Sambamba na hayo, Sweda, amewataka wakuu wa Idara na Vitengo, kusimamia miradi ya elimu kiufasaha, ikiwa ni pamoja na kuwekeza katika miradi mbalimbali ya kiuchumi pasi na kutegemea mishahara yao kutokana na uwepo wa fursa mbalimbali Wilayani Makete kama vile Kilimo.

Kwa upande wake Afisa Manunuzi na Ugavi, Ndg. Mathias Mbafu, akizungumza katika kikao hicho, awamewaomba na kuwasisitiza wakuu wa idara na taasisi za serikakali, kuhakikisha kuwa wanatumia mfumo wa kidigitali wa manunuzi ya Umma, (NeST), ambao umeanzishwa na serikali ili kuboresha mifumo ya ununuzi hapa nchini.

Nao baadhi ya watumishi wa Serikali, wamesema kuwa, wamepokea malekezo hayo, na wapo tayari kuwataumikia wananchi sambamba na Kutumia mfumo wa NeST.

Ikumbukwe kuwa, Mkuu wa Wilaya ya Makete, Mhe. Juma S. Sweda, ameweka utaratibu wa kusikiliza na kutatua kero za watumishi katika kila robo ya mwaka wa fedha.