MKUU WA WILAYA YA MAKETE, AWATAKA WANANCHI KUPATA MITI ILI KULINDA NA UPEPO MKALI KIPINIDI CHA MVUA KUBWA ZA MASIKA

Tarehe Iliyowekwa: January 20th, 2024

Mkuu wa Wilaya ya Makete, Mhe. Juma Sweda, leo Januari 20, amefika katika makazi ya Watu ambao Januari 19,2024, walipata majanga ya kuezuliwa nyumba zao baada ya mvua kubwa iliyoambatana na Upepo kunyesha.

Akiwa katika Maeneo hayo, ambayo yamepata majanga, ambayo ni Kata ya Luwumbu, Mang'oto na Lupalilo, Mhe. Sweda, amewataka wakazi wa maeneo hayo kuchukua tahadhari kwa kupanda miti ambayo itakuwa msaada mkubwa kipindi cha masika.

Aidha, Mhe. Sweda, amewashukuru wananchi wote ambao wameonesha ushirikiano mkubwa katika kuhakikisha kuwa wanaokoa Mali za watu pamoja na kuwasaidia wale ambao wamekutwa na janga hilo.

Sambamba na hayo, Mhe. Sweda , amebainisha kuwa, Kamati ya maafa itatembelea maeneo yote ambayo yanekumbwa na kadhia hiyo, ili iweze kufanya tathmini ya athari ambayo imejitokeza kutokana na mvua hiyo.

Naye, Diwani wa Kata ya Luwumbu, Mhe. Felix Kyando, amesema kuwa wananchi wa Kata hiyo wameshaanza kusaidiana kuezeka nyumba ambazo zimeezuliwa, pamoja na kukusanya michango ili waweze kununua mahitaji ya ujenzi , sambamba na kuiomba serikali kuwasaidia pale watakapoishia.

kumbukwe kuwa, Mamlaka ya Hali ya Hewa, mapema kabla ya kuanza kwa kipindi cha Masika , iliwatahadhrisha wananchi wote kuchua tahadhari ya uwepo wa mvua kubwa kwenye baadhi ya maeneo hapa nchini.