MKUU WA WILAYA YA MAKETE MHE. SWEDA, AWATAKA WANANCHI WILAYANI HUMO, KUCHUKUA TAHADHARI YA UWEPO WA MVUA KUBWA ZINAZOENDELEA KUNYESHA

Tarehe Iliyowekwa: April 8th, 2024

Wananchi wanaoishi kwenye mazingira hatarishi kama vile kwenye mabonde na milimani wilayani Makete, Mkoani Njombe, wametakiwa kuchukua tahadhari kutokana na maeneo mengi hivi sasa kuporomoka kutokana na mvua kubwa zinazoendele kunyesha kwenye maeneo yao, na kusababisha uharibifu wa mazingira pamoja na mazao.

Kauli hiyo imetolewa leo Aprili 8, 2024, na Mkuu wa Wilaya ya Makete Mh. Juma Sweda wakati ametembelea kijiji cha Makwalanga kitongoji cha Mpulo, kilichopo Kata ya Ipelele, mara baada kutokea maporomoko ya udondo kutokana na uwepo wa mvua kali zinazoendelea kunyesha na kusababisha uharibifu wa mazao ya wananchi.

"Chukueni tahadhari ya uwepo wa mvua kubwa inayoendelea kunyesha hapa Wilayani Makete, nanyinyi Viongozi hakikisheni mnatoa taarifa mapema endapo kutatokea maporomoko ambayo yanaweza kuhatarisha maisha ya wananchi" Alsiema Mhe. Sweda.

Kwa upende wake, Afisa Mazingira wa Halmashauri ya Wilaya ya Makete, Bi. Upendo Mgaya, amewataka wananchi wa kitongoji hicho cha Mpulo kuyafuata maagizo yaliyotolewa na viongozi ili kuepukana na madhara yanayoweza kujitokeza, na kuongeza kuwa maporomoko hayo yametokana na mvua kubwa zinazoendelea kunyesha wilayani humo.

Naye, mwenyekiti wa kijiji cha Makwalanga Ndg. Sifa Festo Sanga, amemshukuru mkuu wa wilaya ya Makete, pamoja na viongozi mbalimbali kwa kufika kwa wakati kwenye kitongoji hicho cha Mpulo, kujionea adha hiyo ya mvua, na kwamba hakuna madhara makubwa yaliyojitokeza zaidi ya uharibifu wa mazao yao na mazingira.

Ikumbukwe kuwa, mvua zinazoendelea kunyesha wilayani Makete kwa hivi sasa, zimesababisha kuporomoka kwa udongo kwenye maeneo mbambalimbali, na kusababisha adha kubwa kwa wananchi kama vile Mito kujaa maji, mazao kuharibika pamoja na barabara nyingi kutopitika.