MKUU WA WILAYA YA MAKETE MHE. SWEDA AWATAKA WATUMISHI WA UMMA KUSHIRIKIANA KATIKA UTENDAJI KAZI

Tarehe Iliyowekwa: August 14th, 2024

Mkuu wa wilaya ya Makete Mhe. Juma Sweda amewataka watumishi wa serikali kutekeleza wajibu wao ipasavyo kwa kuwahudumia na kutatua changamoto mbalimbali za Wananchi kwakuwa hilo ndiyo jukumu lao.

Mhe. Sweda, amesema hayo leo Agosti 14,2024, akiwa kwenye ziara ya kusikiliza na kutatua kero za wananchi katika vijiji vitatu ambavyo ni Maleutsi, Ndulamo na Ivalalila vilivyopo katika kata ya Iwawa , na kuwataka watumishi kushirikiana na wananchi ili kuhakikisha kuwa Jamii inakuwa na Maendeleo endelevu.

"Serikali ya awamu ya sita inaendelea kutekeleza miradi mbalimbali kwa kuleta fedha, na kazi iliyobaki ni uwajibikaji wa watumishi na kufanya tathimini ya utendaji ili kuboresha zaidi katika nyanja tofauti kama vile miradi ya umeme, barabara za TARURA, Maji na sekta ya afya" Alisema Sweda.

Aidha, Mhe. Sweda amesema kuwa serikali inaendelea kuimarisha miundombinu katika hospitali ya Wilaya ikiwemo jiko, nyumba ya kupumzikia na kuweka uzio pamoja na upatikanaji wa dawa kwa wakati, kwakuwa hospitali hiyo ya Wilaya imepokea vifaa vya kisasa na kupata majengo ya kisasa, ili wananchi wapate huduma Bora.

Sambamba na hayo, Mkuu wa Wilaya ya Makete, ameongeza kua maendeleo ni hatua hayawezi kumalizika kwa siku moja hivyo serikali inaendelea kutekeleza yale yote ambayo ni mahitaji muhimu kwa wananchi kupitia sekta mbalimbali na halmashauri itaendelea kutoa pesa kwenye vijiji na kutekeleza miradi kwa mapato ya ndani ikiwemo Kituo cha afya na Mbalatse na Mfumbi.

Hata hivyo, Mhe. Sweda, kesho Agosti 15,2024 ataendelea na ziara ya kukagua miradi , kusikiliza na kutatua kero za wananchi kuanzia ngazi ya vijiji pamoja na kutathimini shughuli zinazotekelezwa kwenye maeneo hayo.

Imeandaliwa na:

Kitengo Cha Mawasiliano ya Serikali,

Halmashauri ya Wilaya ya Makete