MRADI WA UCHIMBAJI CHUMA WATAMBULISHWA WILAYANI MAKETE

Tarehe Iliyowekwa: March 5th, 2024

Kampuni ya Uchimbaji wa Chuma Fujian Hexingwang imetambulisha mradi wa Uchimbaji wa Mawe katika Kijiji cha Ipepo Kata ya Ipepo Wilayani Makete Mkoani Njombe.

Mradi huo umetambulishwa leo tarehe 5 Machi, 2024 kwa Wananchi wa Kijiji hicho mbele ya Viongozi mbalimbali ngazi ya Wilaya ya Makete akiwepo Kaimu Mkurugenzi Mtendaji (W) ambaye ni Afisa Maendeleo ya Jamii Bi. Jackline Mrosso , Watalaamu ngazi ya Wilaya na Diwani Kata ya Ipepoo Mhe. Manase Nyaulawa.

Kaimu Mkurugenzi Mtendaji (W) ambaye ni Afisa Maendeleo ya Jamii Bi. Jackline Mrosso amesema ujio wa Mradi huo mkubwa wa Uchimbaji wa Chuma ni fursa kubwa ya Ajira na kukuza uchumi wa Wananchi Wilayani Makete na Tanzania kwa ujumla.

Naye, Mkurugenzi wa Kampuni ya Fujan Fujian Hexingwang, Bwana Xu Xing Da amesema Mazingira mazuri ya Uwekezaji Wilayani Makete, yamepelekea kampuni hiyo, kujikita Wilayani humo sambamba na Usimamizi mzuri wa Serikali ya Awamu ya 6 chini ya Rais Samia Suluhu Hassan.

Kwa Upande wake, Diwani wa Kata ya Ipepo Mhe. Manase Nyaulawa amewashukuru wawekezaji hao kwa kuamua kuwekeza katika kata hiyo na kuwaomba kushirikiana na Wananchi wa Kijiji hicho katika kazi mbalimbali za Maendeleo.

Wananchi wa Kijiji cha Ipepo wamewakaribisha wawekezaji hao na kuwaahidi kutoa ushirikiano wakati wote na kuomba kupewa kipaumbele kwenye masuala ya Ajira pindi mradi utakapoanza kutekelezwa.