MSIMAMIZI WA UCHAGUZI WILAYA YA MAKETE NDG, MAKUFWE ATOA MAELEZO KUHUSU UCHAGUZI WA SERIKALI ZA MITAA

Tarehe Iliyowekwa: September 26th, 2024

Msimamizi wa Uchaguzi wa Wilaya ya Makete, Ndg. William M. Makufwe, Septemba 26,2024, ametoa maelezo kwa weadau wa Uchaguzi wilaya ya Makete wakiwepo viongozi wa vyama vya siasa ili kujenga uelewa wa pamoja katika kulekea kwa uchaguzi huo Novemba 27,2024.

Ndg. Makufwe, ametoa maelezo hayo kwenye Kikao, kilichofanyika katika Ukumbi wa Bomani uliopo makao makuu ya Halmashauri ya Wilaya ya Makete, na kubainisha kuwa serikali ya Jamhuri ya Muungano wa Tanzania itafanya uchaguzi wa serikali za mitaa, hivyo kikao hicho kimelenga kutoa mwelekeo bora wa uchaguzi wa serikali za mitaa.

"serikali imejipanga vizuri kuhakikisha kuwa kunakuwa na uchaguzi wa Uhuru, Haki na Amani , na kwamba sitegemei kuwepo kwa ugomvi au kutokuwepo kwa maelewano baina ya vyama vya siasa, kwasababu siasa si ugomvi" alisema Makufwe.

Aidha, Ndg. Makufwe, amesema kuwa wataendelea kufanya vikao na mikutano mbalimbali ili kuendelea kujengeana uwezo wa kiulewa katika ujuaji wa kanuni na taratibu za uchaguzi wa serikali za mitaa pamoja na kupeana elimu ya umuhimu wa kujiandikisha na kupiga kura.

Nao baadhi ya wadau wa Uchaguzi akiwemo Katibu wa UVCCM wilaya ya Makete, Ndg. Hassan Kapolo, amesema kuwa wao kama wadau wa siasa nchini watahakikisha wanafanya kampeni zenye staha ikiwa ni pamoja na kuhakikisha kuwa Tanzania inakuwa na viongozi wa walio bora kuanzia ngazi ya Vitongoji.

Naye, Mwenyekiti Mstaafu wa Chama Cha Mapinduzi Mkoa wa Njombe, Mzee Jasel Mwamwala, amesema kuwa kuna haja ya kuongeza nguvu katika uhamasishaji ili wananchi wajue umuhimu wa kupiga kura pamoja na kujiandikisha kwenye daftari la mkazi la kupiga kura.

Kwa Upande, Makamu Mwenyekiti wa Makanisa ya Kikristo Wilaya ya Makete, Mchg. Sowo, amesema kuwa Uchaguzi ni kitu muhimu kwakuwa umeanzia kwenye Biblia, hivyo anategemea vyama vya siasa vitaweka wagombea wenye uwezo na weledi pamoja na kutoruhusu malalamiko yasiyo na tija.

Ikumbukwe kuwa, Msimamizi wa Uchaguzi wa Wilaya ya Makete, Ndg. William M. Makufwe, ametoa Maelezo ya Uchaguzi kuelekea kufanyika kwa uchaguzi wa Serikali za Mitaa Novemba 27,2024.