MSIMAMIZI WA UCHAGUZI WILAYA YA MAKETE NDG. MAKUFWE, AWASIHI VIONGOZI WA SIASA KUSHIRIKI KIKAMILIFU KATIKA ZOEZI LA UANDIKISHA WAPIGA KURA

Tarehe Iliyowekwa: October 18th, 2024

Msimamizi wa Uchaguzi Wilaya ya Makete, Ndg. William M. Makufwe, amewasihi Viongozi wa vyama vya Siasa kuhakikisha kuwa wanawahamasisha wanachama wao kujiandikisha ili waweze kupiga kura ifikapo Novemba, 27,2024.

Ndg. Makufwe, amesema hayo leo Oktoba 18,2024, wakati akiongea na wadau wa Uchaguzi wa Tarafa ya Matamba, iliyopo Wilaya ya Makete.

"Niwaombe sana hamasisheni wanachama wenu waende wakajiandikishe, ikiwa ni pamoja na kuwahamasisha watu wenu kugombea nafasi mbalimbali kama vile kuanzia ngazi ya Vijiji na Vitongoji" alisema Makufwe.

Aidha, Ndg. Makufwe, amewataka Viongozi hao wa vyama vya siasa kushirikiana katika zoezi hilo muhimu la Uandikishaji pamoja na siku ya Upigaji kura, kwakuwa wanajenga Taifa Moja.

Sambamba na hayo, Msimamizi wa Uchaguzi Wilaya ya Makete, Ndg. Makufwe, inawezekana kuhamisha Kituo ikiwa taratibu zitafuatwa ili muweze kuandikisha wapiga kura.

Kwa Upande , Katibu Tarafa wa Matamba, amewataka Viongozi wa vyama vya Siasa kufanya Siasa za kujenga Nchi, na si malumbano ambayo yamekuwa yakileta migongano.

Naye, Mtendaji wa Kata ya Matamba, Bi. Theresia , amevishukuru vyama vya Siasa, kwa kuwa na Ushirikiano mzuri katika zoezi la Uandikishaji.

Ikumbukwe kuwa, Serikali kupitia Wizara ya Ofisi ya Rasi-TAMISEMI, inaendesha zoezi la uchaguzi wa viongozi wa serikali za mitaa, Vijiji na vitongozi, ambapo kwasasa zoezi la uandikishaji lipo mwishoni linategemea kukamilisha Octoba 20,2024, na uchaguzi huo unategemewa kufanyika Novemba 27,2024.

Nao baadhi ya Viongozi wa vyama vya Siasa, wamesema kuwa zoezi la Uandikishaji linaenda vizuri licha ya kuwepo kwa changamoto ya muingiliano na shughuli za kiuchumi kama vile Kilimo.

Ikumbukwe kuwa, Kikao hicho kililenga kupeana Taarifa ya mabadiliko ya ratiba ikiwa ni pamoja na kusikiliza changamoto mbalimbali katika zoezi la Uandikishaji wa wapiga kura.