MSIOGOPANE, SIMAMIENI VIGEZO VYA MRADI WA P4R –MHE. SWEDA

Tarehe Iliyowekwa: November 6th, 2023

Mkuu wa wilaya ya Makete Mhe. Juma Sweda, amewataka wasimamizi wa mradi wa Huduma Endelevu wa Maji na Usafi wa Mazingira Vijijini, kuhakikisha wanasimamia vizuri vigezo kiukamilifu ili wilaya ya Makete iweze kupata pesa zote ambazo zimetengwa kwa kila kigezo.

Mhe. Sweda amesema hayo, leo Novemba 6,2023 wakati wa kikao cha kujadili utekelezaji wa mradi wa P4R kwa wilaya ya Makete, ambapo amewataka watekelezaji wa mradi huo kutoogopana ili kuhakikisha wilaya inakuwa safi kuanzia ngazi zote, na kunufaika  na  kwamba hategemei kuona mtu yeyote akikwamisha zoezi hilo.

“Swala usafi wa mazingira wilayani Makete sio geni, tuhakikishe tunapambana nalo ili tufikie asilimia 100, haipendezi kuona wilaya ambayo inayoongoza kwa upatikanaji wa maji inakuwa na vyoo ambayo sio bora, hivyo basi kila mtu awajibike kuhakikisha kuwa tunapata pesa hizo” Alisema Mhe. Sweda.

Aidha, Mhe. Sweda ameagiza kila idara inayohusika na kusimamia swala la lishe bora kwa watoto kuhakikisha wanatimiza wajibu wao kikamilifu ili kuwa na jamii bora, ikiwa ni pamoja na kuhakikisha kuwa mimba za utotoni zinatokomezwa kwa namna yeyote ile.

Kwa upande wake, Mwenyekiti wa Halmashauri ya Wilaya ya Makete, Mhe. Christopher Fungo, amewataka wasimamizi wa miradi wa P4R kuhakikisha kuwa wanajiongeza katika utekelezaji wake, ikiwa ni pamoja na kutumia rasilimali walizonazo ili waweze kupata pesa hizo kwa kila kigezo ambacho kimewekwa na serikali.

“tumieni pesa mlizonazo ambazo mmezitenga kwaajili ya maendeleo ili muweze kukamilisha vigezo ambavyo vimewekwa na serikali katika kuhakikisha unapata pesa hizo za maendeleo ambazo zimewekwa kwa kila kigezo”

Naye Mganga Mkuu wa Wilaya ya Makete Dkt. Ligobert Kalisa, amesema kuwa mradi huo wa P4R utasaidia kuimarisha mapato katika halmashauri, kutokana na kupata pesa nyingi, zaidi ya bilioni moja endapo vigezo vyote vitatimizwa.

Akichangia hoja katika kikao hicho, mwakilishi wa watendaji Kata, Ndg. Bathoromeo Sajilo Makome, amesema kuwa, elimu inatakiwa iendane na usimamizi wa kutosha ili kuhakikisha kuwa usafi wa mazingira unaboreshwa,

Ikumbukwe kuwa, Mradi wa Huduma Endelevu wa Maji na Usafi wa Mazingira Vijijini, umelenga kuboresha usafi wa mazingira kwa kuweka vigezo ambavyo, kila wilaya inatakiwa kuvitimiza ili waweze kuwekewa pesa ambazo zitawasaidia katika kuboresha mazingira, kwenye elimu, majumbani, pamoja na maeneo ya jumuiya.

Imeadaliwa na: 

Kitengo cha Mawasiliano serikalini,

Halmashauri ya Wilaya ya Makete.