NAIBU KATIBU MKUU WIZARA YA KILIMO, DKT. NINDI ATEMBELEA ENEO LA UWEKEZAJI WA KILIMO CHA UMWAGILIAJI KIJIJI CHA IBAGA

Tarehe Iliyowekwa: September 26th, 2025

Naibu Katibu Mkuu Wizara ya Kilimo, anayesimamia Maendeleo ya Mazao na Usalama wa Chakula, Dkt. Stephen J. Nindi, leo Septemba 26,2025, ametembelea na kukagua eneo ambalo ni maarufu kwa kilimo cha Viazi Mviringo, katika kijiji cha Ibaga, Kata Mang’oto, ambako kumepangwa kuwekwa mifumo ya kilimo cha umwagiliaji ili wananachi hao waweze kuzalisha mazao yao kwa misimu yote ndani ya mwaka.

Akiwa katika maeneo hayo, Dkt. Nindi, ameridhia kuwepo kwa mpango huo ambao unaratibiwa na Halmashauri ya Wilaya ya Makete, mara baada ya kujionea mashamba na shughuli mbalimbali za kilimo cha viazi mviringo ambazo zinafanywa na wenyeji wa eneo hilo la Ibaga pamoja na baadhi ya wananchi wanaotoka nje ya Halmashauri hiyo.

Aidha, Dkt. Nindi, amesema kuwa kutokana na kuwepo kwa mito inayotiririsha maji kwa wingi ndani ya Wilaya hiyo, ni vyema pia kuangalia namna ambayo mito hiyo itatumika katika uwekezaji wa miundombinu ya umwagiliaji ili kurahisiha upatikanaji wa maji ya kutosha kwa wakulima.

Sambamba na hayo, Dkt, Nindi, akiongea na baadhi ya wataalam wa Kilimo kutoka mkoani Njombe na Halmashauri ya Wilaya ya Makete, katika ofisi ya Mkuu wa Wilaya ya Makete, amewataka wataalam hao kuwashauri wakulima waingie katika vyama vya Ushirika, ili kurahisisha shughuli zao za kilimo.

Kwa Upande Mkuu wa Wilaya ya Makete, Mhe. Kissa Gwakisa Kasongwa, amemshukuru Naibu katibu Mkuu huyo, kwa kuwatembelea na kuzungumza nao mambo mbalimbali ili kuhakikisha kuwa Kilimo kinaboreshwa na wananchi wananufaika na mipango ya Serikali ya kuwakwamua kiuchumi kupitia kilimo bora na chenye tija.

Nae, Mkurugenzi Mtendaji wa Halmashauri ya Wilaya ya Makete, Ndg, Jerry Daimon Mwaga, akitoa taarifa fupi kwa Naibu katibu Mkuu, Dkt, Nindi, amesema kuwa, hadi sasa tayari mpango wa kuweka mifumo ya umwagiliaji katika eneo la Ibaga upo katika hatua nzuri, na kwamba TARI wamesharidhia kuweka ofisi hapa wilayani Makete, ili waweze kuzalisha mbegu bora ambazo zitatumika na wananchi katika uzalishaji wa Viazi Mviringo