NAWATAKIA MTIHANI MWEMA-MBUNGE MAKETE MHE. SANGA

Tarehe Iliyowekwa: October 3rd, 2022

Wanafunzi wa darasa la saba Wilayani Makete wanaotarajiwa kuhimitu mwishoni mwa wiki hii wameteaswa kujiandaa kimasomo na kisaikolojia ili waweze kufanya mitihani yao vizuri

Nasaha hizo zimetolewa na Mbunge Jimbo la Makete Mhe. Festo Sanga alipowatembea wanafunzi wa shule ya Msingi Ivilikinge Kata ya Isapulano mapema leo na kuzungumza nao huku akiwataka kuweka utulivu wanapokuwa kwenye vyumba vya mitihani.

Mhe. Sanga amesema ili waweze kufaulu vizuri mitihani yao ya kuhitimu darasa la saba wanapaswa kujiandaa vizuri na kufanya mitihani yao kwa utulivu ili wote waweze kujiunga kidato cha kwanza hapo mwakani 2023.

Pamoja na maneno hayo Mhe. Mbunge ametoa zawadi mbalimbali kwa wanafunzi hao ili kuwatia moyo kuelekea siku 2 zilizosalia za mitihani ya kuhitimu darasa la saba.

Mwenyekiti wa Kamati ya Shule ya Msingi Ivilikinge ndugu Estini Asakwe Tweve ameishukuru Serikali kwa kuwapelekea mwalimu wa Kike ambapo shule hiyo haikuwa na mwalimu wa jinsia ya Kike kwa kipindi kirefu jambo lililowafanya kumuomba Mbunge mara kwa mara ili aweze kuwasaidia kumpata mwalimu huyo na sasa amepatikana

Tweve ameongeza kuwa ujio wa mwalimu wa Kike shuleni hapo utasadia watoto wa kike kueleza changamoto zao kwa uwazi tofauti na ilivyokuwa hapo awali.

Mwalimu Ibrahimu Fungo ambaye ni Mwalimu Mkuu wa shule ya Msingi Ivilikinge amemshukuru Mhe. Mbunge kwa kuwatembelea shuleni hapo na kutoa zawadi kwa wanafunzi hao huku akitoa shukrani zake za dhati kwa Uongozi wa Halmashauri ya Wilaya ya Makete kwa kuwapelekea mwalimu wa kike katika shule anayoisimamia na kuahidi wanafunzi wanaohitimu darasa la saba watafanya vizuri kwa kuwa wamewaandaa kimasomo na kisaikolojia vizuri.

Wanafunzi wa Darasa la saba kote nchini wanatarajia kufanya mitihani yao tarehe 5 na 6 mwezi huu huku darasa la nne wakitarajia kufanya tarehe 26 na 27 octoba 2022.