SERIKALI WILAYANI MAKETE YAAHIDI KUSHIRIKIANA NA MAKANISA YOTE ILI KUIJENGA MAKETE KIUCHUMI PAMOJA NA TAIFA ZIMA KWA UJUMLA

Tarehe Iliyowekwa: January 21st, 2024

Serikali wilayani Makete mkoani Njombe imesema itaendelea kushirikiana na dini zote katika kufanikisha utendaji kazi wao na shughuli zote za maendeleo kwa manufaa ya wilaya hiyo, na Taifa zima kwa Ujumla.

Hayo yamesemwa leo Januari 21, 2024 na Mkuu wa wilaya ya Makete Mhe. Juma Sweda, wakati akitoa salamu za serikali kwenye ibaada ya shukrani ya Askofu wa Jimbo Katoliki Njombe Mhashamu Eusebius Kyando iliyofanyika katika Kanisa Katoliki parokia ya Makete

“Sisi kama serikali tutaendelea kushirikiana na kanisa katoliki katika wilaya hii na hata sehemu nyingine, kazi kubwa imefanyika baba askofu mnayo miradi mingi mnaifanya katika maeneo yetu lakini sio hivyo tu, mnawakomboa watu kutoka sehemu walipo na kuwaleta nyumbani kwa bwana sio kitu cha kawaida ni kitu kikubwa sana, magfanikio yanaanza rohoni ndipo yanakwenda sehemu nyingine

Aidha, Mhe. Sweda, amewataka wazazi na walezi ambao watoto wao mpaka sasa hawajaripoti shule, wahakikishe watoto hao wanaripoti kwani mpaka sasa asilimia 40 ya watoto hawajaenda shule tangu zifunguliwe Januari 8, 2024

Kwa upande wake Mhandisi Anthony Sanga ambaye ni Katibu mkuu wizara ya Ardhi Nyumba na maendeleo ya Makazi, amesema kuwa anatambua kazi ngumu aliyopewa Baba Askofu huyo, lakini watamuombea ili kwa uwezo wa Mwenyezi Mungu ambaye amemtuma aweze kuifanya kazi ya uaskofu ipasavyo.

Naye Baba Askofu wa jimbo katoliki la Njombe Mhashamu Eusebius Kyando ameelezea umuhimu wa Viongozi kuwa na hofu ya MUNGU hivyo kuitaka jamii kuwalea watoto wao katika maadili mema ili baadaye waje kupatikana viongozi wanaomjua MUNGU miongoni mwao, ikiwa ni pamoja na kumeombea ili atimize wito ualioitwa na Mungu.