SERIKALI YATAMBULISHA MRADI WA UJENZI WA OFISI ZA UTAWALA KUPITIA TASAF SHULE YA MSINGI TANDALA ILIYOPO KATA YA TANDALA, WILAYANI MAKETE

Tarehe Iliyowekwa: March 25th, 2024

Serikali kupitia Mpango wa Kunusuru Kaya Masikini nchini,  TASAF, umetambulisha mradi wa Ujenzi wa  Jengo la Utawala katika Shule ya Msingi Tandala, Iliyopo  wilayani Makete,  Mkoani Njombe, ambao utaenda kugharimu  kiasi cha shilingi milioni mia moja  na moja za kitanzania.

Akizungumza wakati wa Utambulishaji wa mradi huo, Afisa ufuatiliaji wa TASAF Wilaya za Makete,Wanging'ombe na Njombe Vijijini, Ndg. Heri Mpunza, amesema kuwa,  Machi 25, 2022, wananchi wa kijiji cha Tandala, waliibua mradi huo wa Ujenzi wa Jengo hilo la Utawala.

"tayari fedha hizo zimeshafika, na  TASAF inataka miradi yake ikamilike ndani ya miezi mitatu na ikitokea zaidi ya hapo fedha hizo zinalazimika kurudishwa makao makuu hivyo nawaomba  wananchi mshiriki  kikamilifu katika kufanikisha mradi huu" Alisema Ndg. Mpunza.

Aidha, Ndg. Mpunza amesema kuwa, fedha hizo zimegawanyika katika makundi mawili ambayo ni  ujenzi wa jengo lenyewe utakaogharimu shilingi milioni 92.4 pamoja na fedha za usimamizi na ufuatiliaji kuanzia ngazi ya kijiji  mpaka  mkoa, ambapo mpaka sasa Halmashauri imeanza hatua za awali ili kuendana na kasi ya kukamilisha mradi huo.

Kwa Upande wake, msimamizi wa miradi ya TASAF, wilaya ya Makete, Mhandisi Erick Brown, amesema kuwa, wananchi watahusika katika kuchangia nguvu kazi, ikiwa ni pamoja na kusafisha eneo la  jengo hilo litakapojengwa.Naye, Mwalimu mkuu wa shule ya msingi Tandala, Ndg.  Simoni Haule ameishukuru serikali kupitia TASAF kwa kuwaletea mradi huo muhimu, kwakuwa wamemekuwa wakitumia jengo chakavu jambo ambalo limekuwa hatarishi kiafya pamoja na mali za shule zilizoko ndani ya Ofisi hizo.

Kufuatia uwepo wa mradi huo,  Mtendaji wa kata ya Tandala Ndg. Maximilian Msigwa,  amewataka wananchi kujiandaa kuupokea mradi huo kwakuwa tayari kushiriki shughuli mbalimbali zinazowataka kufanya ili uweze kukamilike kwa wakati.

Ikumbukwe kuwa serikali nchini kupitia Mpango wa Kunusuru kaya Masikini (TASAF), imekuwa ikipokea fedha hizo kwa masharti nafuu kutoka nchi zinazozalisha mafuta kwa wingi duniani yaani Opec huku zikitaka wananchi wahusike katika kusimamia miradi hiyo.