SHAMBA LA MIFUGO LA KITULO, LASIFIWA KWA UZALISHAJI MZURI WA MITAMBA KWAAJI YA MAZIWA HAPA NCHINI

Tarehe Iliyowekwa: July 4th, 2025

Naibu katibu mkuu Wizara ya Mifugo na Uvuvi Bw. Edwin Mahede, leo Julai 4 2025, ametembelea shamba la Mifugo la Kitulo lililopo Wilayani Makete Mkoani Njombe ili kutekeleza azma ya Serikali ya utoaji wa chanjo kwa N’gombe na kuku pamoja na kufanya utambuzi wa mifugo kwa vitendo.

Akizungumza na wataalam wa Mifugo na wafugaji Ndg. Edwin Mahede amesema shamba la kitulo limekuwa ni la mfano Nchini kwani linazalisha Mitamba na Maziwa kwa ajili ya kulisha kwenye viwanda na matumizi ya wananchi wa Matamba,Mkenja na Ndani ya wilaya ya Makete kwa ujumla.

Katika hatua nyingine Ndg. Mahede amesema Shamba la kitulo ni miongoni mwa mwa maeneo yaliyotambuliwa kwa ajili ya kuletewa mpango maalumu wa Chanjo ya Homa ya Mapafu, ikiwa ni pamoja na kufanya utambuzi wa Mifugo kwa kuwawekea alama Maalumu na kuziingiza kwenye mfumo maalumu unaotambua mifugo yote nchini.

Kwa upande wake Kaimu Mkurugenzi Halmashauri ya Wilaya ya Makete, Ndg. Mathias Mbafu, amemshukuru Rais wa Jamhuri ya Muungano wa Tanzania, Mhe, Dkt. Samia Suluhu Hassan na Wizara ya Mifugo na Uvuvi kwa kuwaletea zoezi hilo la uchanjaji na utambuzi wa mifugo ndani ya Halmashauri hiyo.

Wakizungumza kwa niaba ya Wafugaji Ndg. Imani Tweve na Ndg. Erick Jonathan Tenelo wameishukuru serikali kupitia Wizara ya Mifugo na Uvuvi kwa kuwaletea programu hiyo na kuomba iwe endelevu kwao kwa kupatiwa elimu ya mara kwa mara ili waweze kutekeleza ufugaji wenye tija.

Ikumbukwe kuwa zoezi hili la uchanjaji na utambuzi wa Mifugo linaendelea katika maeneo tofauti nchi nzima na kufikia Oktoba 27 mwaka huu litakuwa limemalizika na linaenda sambamba na ugawaji wa Hereni za kuvalisha Ng’ombe masikioni,Mashine za kutobolea masikio,Komputa za kuingizia taarifa na vifaa vingine vya kufanyia kazi.

ReplyForward Add reaction