SHIRIKISHENI WANANCHI KATIKA KILA MIRADI INAYOFANYWA NA SERIKALI KWENYE MAENEO YAO- DC SWEDA

Tarehe Iliyowekwa: December 6th, 2023

Mkuu wa Wilaya ya Makete, Mhe. Juma Sweda, amewataka viongozi wa serikali wilayani humo, kushirikisha wananchi katika ukamilishaji wa Miradi inayofanyika kwenye maeneo yao, Ili waweze kutambua thamani pamoja na uwajibikaji.

Mhe. Sweda, amesema hayo leo Desemba, 6, 2023, wakati akikagua miradi mbalimbali katika kata ya Ipelele, ukiwemo mradi wa Ujenzi wa Daraja katika Kijiji cha Makwaranga, Shule ya Msingi Misiwa, Shule ya Msingi Mafiga, ukarabati wa mradi wa Maji wa unaofanyika katika vijiji vya Ipelele, Misiwa, Mbnga na Makeve, ambao unagharimu Bilioni 1, 266,987,219.5 ....pamoja na Shule ya Msingi Ipelele.

"Hakikisheni wananchi wanashirikishwa katika kila kinachofanyika na serikali  kwenye maeneo yao, ili waweze kutambua thamani ya Miradi yao, pamoja na kuleta uwajibikaji kuanzia ngazi ya chini " Alisema Mhe. Sweda.

Aidha, Mhe. Sweda, amewataka wananchi kuzingatia mlo kamili, wenye virutubisho vya Lishe ili kupambana na Utapiamlo unaopelekea Udumavu, pamoja Ukatili kwa watoto wadogo sambamba na mimba za utotoni.

Kwa Upande, Mrakibu Mwandamizi wa Jeshi Jeshi la Polisi , Wilaya ya Makete, SSP Assel Mwampamba, amesema kuwa Kuna haja ya kujenga kituo Cha Polisi katika kata ya Ipelele, ili kuimarisha ulinzi kutokana na muingiliano mkubwa wa watu katika eneo hilo ambalo linakua kibiashara.

Hata hivyo, Kaimu Afisa Mipango wa Halmashauri ya Wilaya ya Makete, amesema kuwa, Halmashauri ipo kwenye mpango wa kuhakikisha wanakamilisha maboma yote, ikiwa ni pamoja na kuwafanya watumishi kutohama Wilayani humo.