TAASISI ZA SERIKALI NJOONI NA MAWAZO MBADALA KUUINUA UCHUMI WA MAKETE- MHE SWEDA

Tarehe Iliyowekwa: December 1st, 2023

Mkuu wa Wilaya ya Makete, Mhe. Juma Sweda, amewataka watalaam kutoka taasisi mbalimbali za serikali zilizopo, Halmashauri ya wilaya ya Makete, kuhakikisha kuwa wanakuja na mkakati mpya wa kupata mapato ya kutosha bila kutegemea maeneo ya kilimo na wafanyabiashara.

Mhe. Juma Sweda, amesema hayo leo, Desemba 1, 2023, wakati wa Kikao cha Kamati ya Ushauri (DCC), kilichofanyika kwenye Ukumbi wa Bomani, kuwa wilaya ya Makate ni tajiri, inahitaji kutafutwa wawekezaji ili halmashauri iweze kupata mapato ya kutosha.

Sambamba na hayo, Mhe. Sweda amewataka TARURA kutatua changamoto za miundombinu ya barabara, kutoka Ikuwo kuelekea Matamba ili kuwasaidia wakazi wa Ikuwo, ambao wamekuwa katika sintofahamu ya usafiri kwa muda mrefu.

Pia, Mhe.Sweda amewataka wakazi wa Wilaya ya Makete, kuhakikisha kuwa wanapambana ongezeko la Utapiamlo wilayani humo, ikiwa ni kampeni endelevu ya kumkomboa mtoto na ongezeko la Udumavu hapa nchini.

Kwa Upande wake, Mwenyekiti wa Halmashauri ya Wilaya ya Makete, Mhe. Christopher Fungo, ameshukuru kufanyika kwa kikao, na kwamba wameyachukua wataenda kuyafanyia kazi ili wananchi waweze kuhudumiwa vizuri.

Akijibu baadhi ya hoja za wadau katika kikao hicho, DCC, Mkurugenzi Mtendaji wa Halmashauri ya Wilaya ya Makete, Ndg. William M. Makufwe, amewataka wafanyabishara wa Makete kusajiliwa kwenye mfumo wa TAUSI, ikiwa ni pamoja na kupewa elimu ya umuhimu wa kulipa kodi pamoja na mapato ya halmashauri.

Aidha, Ndg. Makufwe, amesema kuwa wameshaomba maghala manne ambayo yatatumika katika kuhifadhia Ngao, kutokana na kuwepo kwa ongezeko la mavuno ya zao hilo, ambalo limeonekana kuwa mkombozi kwa wakulima wilayani Makete, ikiwa ni pamoja na kutaka kuwekeza katika ujenzi wa kiwanda kikubwa cha kusindika zao hilo.

Wakichangia kwa nafasi tofauti, baadhi ya wakuu wa Idara na Vitengo, akiwepo Afisa Manunuzi wa Halmashauri ya Wilaya ya Makete, Ndg. Mathias Mbafu, amesema kuwa wananchi wanatakiwa kuwezeshwa mikopo, ambayo itawasaidia kununua mashinde ndogo ndogo, ambazo zitawasaidia kuchakata mazao mbalimbali kama vile ngano.

Hata hivyo, kikao cha Kamati ya Ushauri wilaya ya Makete, DCC, kimehitimishwa kwa kuundwa kwa kamati ya ambayo itachakata fursa mbalimbali za uwekezaji, wilayani humo ili wilaya hiyo iweze kufunguka kiuchumi.

Imeandaliwa na:

Kitengo cha Mawasiliano Serikalini

Halmashauri ya Wilaya ya Makete.