TIMU YA KITAIFA KUFUTILIA MIGOGORO YA ARDHI YAFIKA MAKETE

Tarehe Iliyowekwa: September 29th, 2022

Timu ya Kitaifa ya utekelezaji wa maagizo ya Baraza la mawaziri kuhusu Migogoro ya ardhi katika maeneo ya hifadhi, mashamba na ranchi imefika Wilayani Makete kuanza kufanyia kazi migogoro iliyopo baina ya wananchi na Hifadhi.

Wakizungumza na Mkuu wa Wilaya ya Makete Mhe. Juma Sweda wataalamu wanaounda timu hiyo ya Kitaifa wakiambatana watalaamu wa Ardhi Wilaya ya Makete, Afisa maendeleo ya Jamii wamesema timu itafanya kazi ya kusikiliza viongozi wa Halmashauri za vijiji vyenye migogoro na kufika katika maeneo husika.

Kiongozi wa Timu hiyo ya Kitaifa Michael Gwandu amesema vijiji 9 vinavyopakana na Hifadhi ya Taifa ya Kitulo na mpanga Kipengere vitafikiwa na watalaamu hao ili kuona na kusikiliza migogoro iliyopo katika maeneo husika.

“Tunakwenda katika vijiji 9 ambavyo kuna mgogoro tukiambatana na watalaamu ngazi ya Wilaya ya Makete pamoja na Halmashauri ya kila Kijiji na kufika uwandani kufanya tathmini ya hali halisi”.

Mwenyekiti wa ulinzi na Usalama Wilaya ambaye ni Mkuu wa Wilaya ya Makete Mhe. Juma Sweda amewashukuru wataalamu hao kufika Makete ili kusikilizia migogoro ya mipaka kati ya Hifadhi ya Taifa Kitulo, Mpanga kipengere na wananchi baadhi ya ya vijiji vinavyopakana na maeneo hayo.

“Niishukuru Serikali kwa kuleta timu hii hapa Makete ambayo ninaimani inafanya kazi nzuri na kubwa sana baada ya kufanya ushirikishwaji kwa viongozi wa Halmashauri za vijiji ili kupunguza migogoro iliyopo kati ya wananchi na Serikali yetu Sikivu ya Mama Samia Suluhu Hassan”.

Katika Mikutano ya kuwasikiliza wananchi iliyofanywa na Mkuu wa Wilaya kila Kijiji miezi kadhaa iliyopita amekuwa akipokea changamoto kubwa ya migogoro ikiwemo wananchi kukosa maeneo ya kufanya shughuli za uzalishaji na ufugaji kwa kuwa yameshachukuliwa na Hifadhi au Mpanga kipengere.

Pia katika ziara za Mbunge Jimbo la Makete Mhe. Festo Sanga kwa wananchi amekuwa akipokea changamoto hiyo jambo lililomfanya azungumzie mara kwa mara Bungeni kuhusu mateso wanayoyapata wananchi ambapo pia mwezi mmoja uliopita Waziri wa Maliasili na Utalii Mhe. Balozi Dkt. Pindi Chana mbele ya Rais Samia Suluhu Hassani akiwa Wilayani Makete aliagiza kufika kwa timu hiyo ya Kitaifa Wilayani Makete kuanza kushughulikia migogoro hiyo ya ardhi.

Baada ya Timu hiyo ya Kitaifa kumaliza kazi ya ufuatiliaji wa migogoro hiyo katika maeneo ya Hifadhi, mashamba na Ranchi Timu ya Mawaziri 8 itafika Makete kufuatilia utekeleaji wa maagizo ya Baraza la Mawaziri.