TUSIWAFICHE WATOTO WENYE ULEMAVU-SINGANO

Tarehe Iliyowekwa: August 15th, 2022

Afisa elimu maalum Wilaya ya Makete Mwl. Asnati Singano amewasihi wazazi na walezi Wilayani Makete kutowaficha watoto wenye ulemavu badala yake wawafichue ili waweze kupata haki yao ya kupata elimu

Akizungumza na Kitulo mapema leo 15 Agosti 2022 kwenye kipindi cha Morning Power, Mwl. Singano amesema kumekuwa na baadhi ya wazazi/walezi kuwaficha Watoto wenye ulemavu ambao wanamatatizo mbalimbali ya viungo katika miili yao

Singano amesema “kumekuwa na baadhi ya wazazi/walezi wamekuwa na tabia ya kuwaficha Watoto wao wenye ulemavu mbalimbali na tunapotafuta taarifa za Watoto hao inakuwa vigumu kupata ushirikiano kutoka kwao”

“Sasa ni wakati wa kuwachukulia sheria kwa kuwa Watoto hawa wananyimwa haki yao ya kimsingi ya kupata elimu na vifaa mbalimbali vinavyoweza kuwasaidia kupata elimu na kutojiona kama wametengwa na jamii”

Wilaya ya Makete inazaidi ya Watoto 200 wenye ulemavu wa vioungo mbalimbali ikiwemo Miguu, usikivu hafifu, ulemavu wa Ngozi n.k

Zoezi la kufanya utambuzi kwa Watoto wenye ulemavu na wenye uhitaji maalumu linaendelea kufanyika kwa lengo la kuwatambua na kuwasaidia waweze kupata elimu katika mazingira wezeshi.