TUTUNZE MAZINGIRA YATUTUNZE-DC MAKETE

Tarehe Iliyowekwa: October 10th, 2022

Wananchi wilayani Makete Mkoani Njombe wametakiwa kushirikiana katika kuyatunza mazingira ikiwa ni pamoja na kuacha tabia ya kuchoma moto misitu kutokana na shughuli mbalimbali  za kibinadamu

Hayo yamesemwa na mkuu wa Wilaya ya Makete Mhe.Juma Samweli Sweda kwenye uzinduzi wa mpeni ya moto iliyofanyika leo 10 Octoba, 2022 Kata ya Lupalilo kijiji cha Mago, kampeni iliyoandaliwa na shirika la panda miti kibiashara kwa kushrikiana na Halmashauri ya Wilaya ya Makete.

Mhe. Sweda Amesema “uchomaji wa moto mazingira kunawafanya hata wawekezaji kwa upande wa misitu kuogopa kuja kuwekeza hapa wilayani Makete kutokana na uchomaji moto kiholela huku akiongeza kuwa Serikali inakemea vikali vitendo hivyo kwa kuwa vinarudisha nyuma maendeleo ya wananchi na kuwapatia hasara kubwa kutokana na miti yao kuungua moto”

Aidha amesema kuwa kama uchomaji wa moto holela utaendelea Wilayani Makete kutakuwa na athari kubwa ikiwa ni pamoja na upungufu wa mvua na hiyo inaweza kupelekea njaa katika jamii na kuwafanya wananchi kukosa kipato kutokana na uharibifu wa mazingira.

Mbunge Jimbo la Makete Mhe. Festo Sanga ameshukuru uwepo wa Shirika la Pandamiti Kibiashara katika Wilaya ya Makete jambo ambalo linawafanya wananchi waweze kupata elimu ya mara kwa mara kuhusu utunzaji wa Mazingira na kutambua umuhimu wa miti katika shughuli zao za kila siku.

"Nawashukuru sana watu wa Pandamiti kwa kuona umuhimu wa kushirikiana na Serikali katika kutoa elimu kwa wananchi hawa ambao kwa kiasi kikubwa uchumi wao upo kwenye miti, ninaamini tutaondokana na adha hii ya kuchoma moto hovyo na kusababisha hasara kubwa kwa Familia, Jamii, wawekezaji na Serikali kukosa mapato"

Kwa upande wake Diwani wa Kata ya Lupalilo Mhe.Imani Mahenge amesema kumekuwa na changamoto ya uchomaji moto hovyo wa misitu katika Kata hiyo na kuwaomba wananchi kufuata utaratibu wa kuchoma mashamba ikiwa ni pamoja kuchukua barua kwa watendaji na atakae kiuka sharia na utaratibu utaratibu atachukuliwa hatua

Baadhi ya wananchi waliohudhuria katika uzinduzi wa kampeni hiyo ya moto wamesema Elimu hiyo iliyotolewa na Mkuu wa wilaya wataifanyia kazi kwani wameipokea kwa mikono miwili na wamewasihi wananchi wengine kushirikiana katika kutokomeza tabia ya uchomaji mashamba pasipo kufuata utaratibu

Kutokana na elimu iliyotolewa katika mkutano huo juu ya utunzaji mazigira kwa wananchi hapa wilayani makete itapelekea kupungua kwa uchomaji moto pasipo kufuata utaratibu