UJENZI BWAWA LA UMEME KUANZA MAKETE

Tarehe Iliyowekwa: July 29th, 2022

Waziri wa Nishati Mh. Januari Makamba amefanya ziara ya kukagua maeneo ambapo mradi wa bwawa kubwa la umeme utajengwa kwenye mto LUMAKALI wilayani Makete

Mh. Makamba amesema mradi huo mkubwa utakaozalisha Umeme wenye Megawati zaidi ya 200 utaunganishwa na gridi ya Taifa ili kuongeza nguvu katika umeme na tayari Serikali imetenga bilioni nane kwa mwaka huu wa fedha 2022/2023 kwa ajili ya maandalizi.

“Mradi unathamani ya Trilioni 1.4 na sasa tayari Serikali imeanza utekelezaji rasmi kwa kutenga fedha Bilioni 8 kwa ajili ya maandalizi, lakini kuhusu fidia wananchi msiwe na hofu italipwa na wataalamu kuanzia tarehe 1 agosti 2022 watakuwa hapa kwa ajili ya kuanza kazi hiyo”.

"Nawahikishia kuwa kazi inaanza ya kujengwa Bwawa hili kubwa la Umeme la kihistoria kwa wilaya na mkoa wetu zaidi ya watu 7,000 watakuja hapa, ni vema wanamakete mkaona fursa hii ya kujiinua kichumi”

Mbunge wenu amenisumbua sana kwenye hili, sisi kama Serikali hatutawaangusha, muda umefika wa kujenga Bwawa hili." Mh. Makamba

Mbunge Jimbo la Makete Mh. Festo Sanga amemshukuru Mh. Rais Samia Suluhu Hassan kwa kutambua umuhimu wa mradi huo katika kukuza uchumi wa wananchi wa Makete na Taifa kwa ujumla

Pia Mh. Sanga amesema mradi huo utasaidia ajira nyingi kwa wanamakete na kuongeza uzalishaji kwa kuwa na viwanda ndani ya wilaya hiyo.