UKIKAMATWA NA MIFUKO YA PLASTIKI JELA MIAKA MIWILI

Tarehe Iliyowekwa: September 20th, 2022

Wafanyabiashara na wananchi Wilayani Makete wameaswa kutoatumia mifuko ya plastiki kufuatia katazo lililotolewa na Serikali mwaka 2019 ili kuhakikisha usalama wa watu na mazingira.

Afisa Mazingira na udhibiti wa taka ngumu Wilaya ya Makete Upendo Mgaya amesema kumekuwa na wafanyabiashara na wananchi wanaokiuka sheria kwa kutumia bidhaa hizo ambazo zilipigwa marufuku kwa matumizi ya kila siku.

Mgaya amesema kutokana na athari mbaya zinazosababishwa na matumizi ya mifuko hiyo ambayo inakemikali zenye sumu na kwa kuwa haziyeyuki zinapokuwa katika mwili wa binadamu au mnyama katika mfumo wa chakula.

Vilevile mifuko hiyo husababisha uharibifu wa miundombinu pamoja na uchafuzi wa mazingira kwa ujumla.

“Wakati wowote tutafanya ukaguzi kwenye bishara mbalimbali katika maeneo yote Wilayani Makete hivyo hatua za kisheria zitachukuliwa kwa watakaobainika pamoja na wateja ambao wananunua vitu na kufungasha katika mifuko hiyo”.

Mgaya amewaagiza wafanyabishara na wananchi wenye mifuko hiyo ya plastiki nyumbani au kwenye maeneo ya biashara kuisalimisha katika ofisi za vijiji husika mapema iwezekanavyo kabla yah atua za kisheria kuchukuliwa dhidi yao.

“Kwa  mujibu wa kanuni ya Mazingira yam waka 2019 mtu yeyote atakayekamatwa anatumia mifuko hiyo atatozwa faini isiyopungua elfu thelathini (30,000) na isiyozidi Bilioni moja au kifungu kisichopungua siku sab ana kisichozidi miaka miwili au vyote kwa pamoja”

Pia amewasihi wafanyabiashara na wananchi kutumia mifuko mbadala ya karatasi, vifuko vya vitambaa na vikapu kwa kulinda afya ya jamii, Wanyama, mazingira na miundombinu.