UKOSEFU WA SARE SIO KIGEZO CHA KUTOANDIKISHWA SHULE - DED MAKUFWE

Tarehe Iliyowekwa: January 17th, 2024

Mkurugenzi Mtendaji wa Halmashauri ya Wilaya ya Makete, Ndg. William M. Makufwe, leo Januari 17, 2024, ameendelea na ziara kwa  kutembelea kata Mbili za Bulongwa na Kipagalo, zilizopo Wilayani Makete, ikiwa ni mwendelezo wa Kukagua Uandikishaji wa wanafunzi Kwa ngazi ya Awali, Msingi na Sekondari, pamoja na kusikiliza changamoto za Kata kupitia Kamati za  Maendeleo za Kata, KAMAKA.

Akiwa katika Kata hizo mbili, Ndg. William M. Makufwe, amewataka wazazi kuwapeleka watoto Shule hata kama bado hawajanunuliwa sare za Shule ,ili waweze kuendana na mitaala.

Aidha, Ndg. Makufwe amewataka wakazi wa Kata hizo mbili za Bulongwa na Kipagalo, kushiriki katika Maendeleo kupitia miradi inayoletwa na serikali kwenye maeneo yao, kwakuwa ni uwezekazaji mkubwa ambao umekuwa ukifanywa na Rais wa Jamhuri ya Muungano wa Tanzania, Mhe. Dkt. Samia Suluhu Hassan, ikiwa ni pamoja na kuwakumbusha kusimamia mapato kuanziaa ngazi ya Kijiji.

Sambamba na hayo, Ndg. Makufwe, amewataka wakazi wa Makete, kuhakikisha kuwa wanapambana na Udumavu kwa kuwapa watoto wao Lishe Bora, ili wasije kuwa mzigo kwa Taifa  na familia zao hapo baadae.

Kwa upande wake, Afisa Lishe, kutoka  Hospitali ya Wilaya ya Makete, Bi. Agnes Columbani, amewataka wakazi wa Kata hizo, kuendelea kupambana na Udumavu kwa kupanda Mboga Mboga pamoja na kufuga wanyama ambao sio gharama kuwahudumia mama vile kuku, Sungura ili waweze kutumika kama kitoweo kwa watoto wao.

Naye, Mwalimu Mkuu wa Shule ya Msingi Mahulu, Ndg. Remijo Tweve, amemshukuru Mkurugenzi Mtendaji wa Halmashauri ya Wilaya ya Makete, Ndg. William M. Makufwe, Kwa  kuamua kusikiliza kero za wananchi kuanzia ngazi ya Kitongoji, kitu ambacho viongozi wengi wa ngazi yake wameshindwa kufanya.

Ikumbukwe kuwa, Mkurugenzi Mtendaji wa Halmashauri ya Wilaya ya Makete, Ndg. William Makufwe, leo Januari 17, 2024, ameendelea na ziara Kwa kukutana na Madiwani, Watendaji Kata, Watendaji wa Vijiji, Wenyeviti wa Vijiji, Wenyeviti wa Vitongoji pamoja Uongozi wa CCM kuanzia ngazi ya Vijiji.

Imeandaliwa na:

Kitengo cha Mawasiliano Serikalini.

Halmashauri ya Wilaya ya Makete.