UTOAJI TAARIFA MATUKIO YA UKATILI KWA SIMU

Tarehe Iliyowekwa: September 27th, 2022

Wizara ya katiba na sheria imeahidi kusambaza machapisho ya kutosha pamoja na kusambaza namba za simu kote nhini ambazo zitapigwa bila malipo yoyote ili kutokomeza na kubainisha matatizo mbalimbali yanayohitaji msaada wa kisheria na kuweza kuyatatua.

Akizungumza hayo kwa niaba ya Waziri wa katiba na sheria Katibu mkuu wa wizara hiyo Marry Makondo Katika sherehe za maadhimisho ya miaka 27 ya kituo cha haki za binadamu (LRHC) yaliyofanyika mkoani Njombe amesema sambamba na mikakati hiyo lakini pia wazazi na walimu wanapaswa kuwaangalia watoto kwa ukaribu na kutoa taarifa pindi waonapo wototo hao wakitendewa vitendo visivyo vya kibinadamu na hasa ulawiti na ubakaji.

Sanjari na hilo pia ameitaka mikoa yote pamoja na halmashauri zake kuhakikisha kuwa katika mashule na vyuo kunakuwepo na vilabu mbalimbali ili kutoa elimu, kukomesha na kubainisha matukio ya kikatili hivyo wizara hiyo itasaidi katika masuala ya kisera na kutambulika kisheria.

Aidha ameyataka mashirika mbalimbali kuiga mfano wa kituo cha sheria na haki za binadamu kwa kufanya shughuli zinazogusa jamii moja kwa moja badala ya kutumia rasilimali nyingi katika kufanya warsha, semina pamoja na shughuli ambazo hazina uhusiano wa moja kwa moja na wananchi.