UTOAJI WA ELIMU KUHUSU MIKOPO YA WANAWAKE NA VIJANA

Tarehe Iliyowekwa: February 15th, 2023

Wataalamu kutoka Idara ya Maendeleo ya Jamii Halmashauri ya Wilaya Makete wameanza utoaji wa Elimu kuhusu mikopo inayotarajiwa kuanza kutolewa na Serikali kwa Wanawake na Vijana kote nchini

Utoaji wa Elimu hiyo umeanza katika Kata ya Ipepo, Lupila na Mbalatse ambapo wananchi kutoka vijiji vyote vya Kata hizo wamehudhuria kwenye mikutano kusikiliza utoaji wa Elimu hiyo.

Afisa Maendeleo kutoka Idara ya Maendeleo ya Jamii Elizabeth Sanga akizungumza na wananchi wa Kata ya Ipepo amesema Serikali imekusudia kutoa mikopo kwa Wanawake kuanzia Shilingi sifuri hadi Milioni 50 kupitia mtu mmoja mmoja, vikundi, Saccos na Makampuni mbalimbali ya Wanawake na Vijana.

Akielezea zaidi kuhusu mikopo hiyo Sanga amesema itatolewa ndani ya siku 30 baada ya kuwasilishwa Wizarani huku ikiwa na riba ya 4% wakati wa urejeshaji wa mkopo husika.

Ndg. Henry Nyigu Afisa Maendeleo, akizungumza na wananchi hao kwa nyakati tofauti Kata ya Ipepo, Lupila na Mbalatse amesema Wanawake na Vijana wanapaswa kutumia fursa hiyo ya mikopo ili kujikwamua kichumi mara tu baada ya zoezi la utoaji Elimu kukamilika huku akiwaasa vijana kujikita katika shughuli za kimaendeleo ikiwemo Kilimo na Biashara

Mikopo hiyo kwa Vijana itatolewa kuanzia Shilingi sifuri hadi Milioni 50 kwa Makampuni, Vikundi na hata kijana mmoja mmoja ambapo mkopo huo kwa Vijana utakuwa na riba ya 5%

Efransia Mwasanga Afisa Maendeleo ya Jamii amesema ujio wa Mikopo hiyo ni fursa zaidi kwani Halmashauri imekuwa ikitoa mikopo bila riba kwa Wanawake, Vijana na watu Walemavu lakini hii ni mikopo ambayo inariba kidogo na itarudishwa ndani ya Miaka mitatu.